Ўзбекистонда махсус лойиҳа доирасида «аёллар дафтари», «темир дафтар»га кирган оилаларнинг юрак касалликлари мавжуд бўлган ва жарроҳлик амалиётига муҳтож бўлган фарзандларига бепул операция хизматлари тақдим этилади. Бу ҳақда Маҳалла ва оилани қўллаб-қувватлаш вазирлиги бўлим бошлиғи Гулжамол Шукурова маълум қилди.
«Вояга етмаганлар ўртасида ҳуқуқбузарликларнинг олдини олишда масъул тузилмаларнинг роли ва ўзаро таъсирини кучайтириш мақсадида ихтисослаштирилган ёпиқ турдаги таълим муассасаларини тарк этаётган 310 нафар боланинг ижтимоий мослашувини қўллаб-қувватлаш лойиҳаси амалга оширилади.
Лойиҳа доирасида «аёллар дафтари», «темир дафтар»га кирган оилаларнинг юрак касалликлари мавжуд бўлган ва жарроҳлик амалиётига муҳтож бўлган фарзандларига бепул операциялар ва реабилитация хизматлари тақдим этилади.
Шунингдек, республика миқёсида «аёллар дафтари», «темир дафтар»га кирган оилаларнинг, Меҳрибонлик уйларида тарбияланувчи лаб-жағ соҳасида нуқсони бўлган, тананинг турли қисмларида куйиш оқибати пластик жарроҳликка муҳтож бўлган 200 нафар болаларга операциялар ва реабилитация хизматлари тақдим этилади.
Мазкур лойиҳа учун Корея халқаро ҳамкорлик агентлиги томонидан 550 минг АҚШ доллари миқдоридаги грант маблағлари ажратилиши режалаштирилмоқда», – дейди Гулжамол Шукурова.
Бундан аввал Ўзбекистонда «аёллар дафтари»га киритилган ёлғиз аёлларнинг фарзандлари ҳам боғчага имтиёзли рўйхат асосида қабул қилиниши, Фарғонада Наврўз байрами арафасида 30 нафар эҳтиёжманд боланинг хатна тўйи ўтказилгани ҳамда Ўзбекистонда «Ёшлар дафтари»га киритилганларга 980 минг сўмгача бир марталик ёрдам кўрсатилиши ҳақида хабар берилганди.
Изоҳ (0)