Шимолий Корея раҳбари Ким Чен Ин охирги 24 кун ичида оммага кўриниш бермади. Бу унинг 2021 йилда энг узоқ муддат жамоат олдида кўриниш бермагани ҳисобланади, деб ёзмоқда «ТАСС».
Фото: EPA
Охирги марта Ким Чен Ин 7 май куни Пхеньянда ўтказилган концертда қатнашган эди.
«Бу жорий йилда Ким Чен Иннинг жамоатчилик олдида чиқиш қилмаган энг узоқ муддати бўлди», — деди КХДР билан муносабатларни назорат қилувчи Жанубий Кореянинг бирлашиш вазирлиги вакили.
У Шимолий Корея раҳбарининг кўриниш бермаётганининг эҳтимолий сабабларини айтмади.
Бу вақт мобайнида 28 май куни у Сурия президенти Башар Асадга мактуб йўллагани, унда Асадни президентлик лавозимга қайта сайлангани билан табриклагани маълум бўлди.
Ким Чен Ин 2011 йилда отаси Ким Чен Ирнинг вафотидан кейин ҳукуматга келган эди.
Аввалроқ Ким Чен Ин дунёда коронавируснинг кенг тарқалаётганидан хавотирда экани сабабли ўзининг оммавий тадбирлардаги иштирокини қисқартиргани ҳақида хабар берилди.
Эслатиб ўтамиз, 2020 йилнинг май ойида CNN телеканали АҚШнинг КХДР етакчиси Ким Чен Иннинг соғлиғи жарроҳлик амалиётидан сўнг ёмонлашгани тўғрисидаги разведка маълумотларини ўрганаётганини маълум қилганди. Daily NK’нинг ёзишича, Ким Чен Инда 12 апрель куни юрак-қон томир тизимига боғлиқ жарроҳлик амалиёти ўтказилган. Бироқ АҚШ собиқ президенти Дональд Трамп Ким Чен Иннинг соғлиғи ёмонлашгани тўғрисидаги маълумотлар хато эканлигини билдириб, CNN’га доим ҳам ишонавермаслигини айтган. 27 апрель куни Жанубий Корея президенти маслаҳатчиси КХДР етакчиси соппа-соғ эканлигини маълум қилган.
