Bayden Kim Chen In bilan uchrashuv shartlarini ma’lum qildi
AQSh prezidenti Jo Bayden KXDR yetakchisi Kim Chen In bilan muayyan shartlar asosida uchrashib suhbatlashib olishga tayyorligini bildirdi. U bu haqda Janubiy Koreya davlat rahbari Mun Chje In bilan Oq uyda o‘tkazilgan matbuot anjumanida ma’lum qilgan.
“Agar u (Kim Chen In — tah.) uchrashuvimiz uchun muayyan majburiyatlarni o‘z zimmasiga olsa (KXDRdagi yadro quroli yo‘q qilinsa), ko‘rishib, gaplashib olish uchun shart-sharoitlar ta’minlansa, biz suhbatlashib olishimiz mumkin”, — degan Bayden.
AQSh prezidentining so‘zlariga ko‘ra uchrashuvlar haqida gapirishdan avval muayyan shartlarning bajarilishini ta’minlash zarur. Uning qo‘shimcha qilishicha, bu boradagi muzokaralar quyi darajada boshlanadi.
Shuningdek, Bayden yaqin tarixda qilingan ishlarni takrorlamoqchi emasligini ma’lum qilgan.
“Men unga (Kim Chen In — tah.) o‘zi istgan narsani, ya’ni xalqaro darajada tan olinish imkonini bermoqchi emasman”, — degan AQSh prezidenti.
Washington Post nashrining yozishicha,t Bayden yuqoridagi jumlalar orqali o‘zidan oldin mamlakat rahbari bo‘lgan Donald Trampning KXDR raisi bilan xalqaro darajadagi munosabatlariga sha’ma qilgan.
AQSh davlat rahbari mamlakatning KXDR masalalari bo‘yicha yangi maxsus vakili etib, davlat kotibining Sharqiy Osiyo va Tinch okeani mintaqasi masalalari bo‘yicha yordamchisi vazifasini bajaruvchi lavozimida ishlagan Sun Kimni tayinlagan. Tayinlov haqida e’lon qilgan vaqtida Bayden AQShning Janubiy Koreya bilan Koreya yarim orolidagi keskinlikni kamaytirish uchun pragmatik qadamlar tashlashga tayyorligini ta’kidlab o‘tgan. U asosiy maqsad hududni yadro qurolidan to‘liq tozalash ekanini bildirgan.
Mart oyida Oq uy matbuot kotibi Jen Psaki Baydenning Tramp kabi Kim Chen In bilan shaxsan ko‘rishmoqchi emasligini aytgan.
“Menimcha Baydenning bu boradagi harakatlari va maqsadi butunlay boshqa”, – degan Psaki.
Undan avval Reuters agentligi AQSh administratsiyasining qariyb bir oy davomida KXDR rahbariyati bilan aloqa o‘rnata olmaganini xabar qilgan. Agentlik AQSh hukumatining Shimoliy Koreya bilan yadro dasturi borasida fikr almashish uchun aloqaga chiqishga uringani haqida yozgan.
2020-yil oktabr oyi oxirida AQSh prezidenti lavozimida ishlagan Donald Tramp o‘z harakatlari bilan mamlakat hamda KXDR o‘rtasida yuzaga kelishi mumkin bo‘lgan yadro urushining oldi olingani haqida gapirgan.
“Hozirgi paytda mening Kim Chen In bilan munosabatlarim juda yaxshi. Sodir bo‘lishi mumkin bo‘lgan urushning esa oldi olingan”, – deya maqtangan Tramp.
Tramp hamda Kim Chen In uch marta uchrashgan. Birinchi uchrashuv 2018-yil 12-iyunda Singapurda o‘tkazilgan va ikki davlat rahbarlari Koreya yarimorolida yadro qurolidan foydalanmaslik haqidagi deklaratsiyani imzolagan. Keyinggi muzokaralar 2019-yil Vyetnamda bo‘ldi va hech qanday hujjat imzolanmasidan oldin yakuniga yetdi. Shuningdek, Tramp va Kim Chen In bir necha marta xatlar orqali ham ma’lumot almashgan. Keyinchalik Shimoliy Koreya raketalar sinovini boshladi va bu AQSh hukumatining noroziligiga sabab bo‘ldi.
