Shimoliy Koreya rahbari Kim Chen In oxirgi 24 kun ichida ommaga ko‘rinish bermadi. Bu uning 2021-yilda eng uzoq muddat jamoat oldida ko‘rinish bermagani hisoblanadi, deb yozmoqda “TASS”.
Oxirgi marta Kim Chen In 7-may kuni Pxenyanda o‘tkazilgan konsertda qatnashgan edi.
“Bu joriy yilda Kim Chen Inning jamoatchilik oldida chiqish qilmagan eng uzoq muddati bo‘ldi”, — dedi KXDR bilan munosabatlarni nazorat qiluvchi Janubiy Koreyaning birlashish vazirligi vakili.
U Shimoliy Koreya rahbarining ko‘rinish bermayotganining ehtimoliy sabablarini aytmadi.
Bu vaqt mobaynida 28-may kuni u Suriya prezidenti Bashar Asadga maktub yo‘llagani, unda Asadni prezidentlik lavozimga qayta saylangani bilan tabriklagani ma’lum bo‘ldi.
Kim Chen In 2011-yilda otasi Kim Chen Irning vafotidan keyin hukumatga kelgan edi.
Avvalroq Kim Chen In dunyoda koronavirusning keng tarqalayotganidan xavotirda ekani sababli o‘zining ommaviy tadbirlardagi ishtirokini qisqartirgani haqida xabar berildi.
Eslatib o‘tamiz, 2020-yilning may oyida CNN telekanali AQShning KXDR yetakchisi Kim Chen Inning sog‘lig‘i jarrohlik amaliyotidan so‘ng yomonlashgani to‘g‘risidagi razvedka ma’lumotlarini o‘rganayotganini ma’lum qilgandi. Daily NK’ning yozishicha, Kim Chen Inda 12-aprel kuni yurak-qon tomir tizimiga bog‘liq jarrohlik amaliyoti o‘tkazilgan. Biroq AQSh sobiq prezidenti Donald Tramp Kim Chen Inning sog‘lig‘i yomonlashgani to‘g‘risidagi ma’lumotlar xato ekanligini bildirib, CNN’ga doim ham ishonavermasligini aytgan. 27-aprel kuni Janubiy Koreya prezidenti maslahatchisi KXDR yetakchisi soppa-sog‘ ekanligini ma’lum qilgan.
Izoh (0)