Shimoliy Koreya Mehnat partiyasining VIII qurultoyida KXDR yetakchisi Kim Chen In partiya bosh kotibi etib saylandi. Bu haqda Koreya markaziy telegraf agentligiga tayanib, “RBK” xabar berdi.
Foto: KCNA
Biroz avval ishtirokchilar Koreya Mehnat partiyasining nizomiga kiritilgan o‘zgartirishni tasdiqlagan edi. Unga ko‘ra, navbatdagi qurultoylar besh yilda bir marotaba o‘tkaziladi.
Yig‘inda chiqish qilgan Kim Chen In AQShni KXDRning asosiy dushmani deb atagan. “Kelgusidagi tashqi siyosiy faoliyatimiz inqilobiy rivojlanishimiz yo‘lidagi asosiy to‘siq va eng katta dushman bo‘lgan AQShni bostirish va bo‘ysundirishga qaratilgan bo‘lishi kerak”, — deydi u.
KXDR yetakchisining so‘zlariga ko‘ra, Pxenyan Moskva bilan ikki tomonlama munosabatlarni mustahkamlash niyatida, mamlakat ularni kengaytirish va rivojlantirishga “poydevor qo‘ygan”.
Partiyaning bundan oldingi qurultoyi 2016-yilning 6-mayida o‘tkazilgan edi. O‘shanda KXDR yetakchisi Koreya Mehnat partiyasi raisi etib saylangandi.
Eslatib o‘tamiz, 2020-yil aprelidan boshlab, Kim Chen In salkam ikki hafta omma oldida ko‘rinish bermagach, OAV va ijtimoiy tarmoqlarda KXDR yetakchisi og‘ir kasallikka chalingani yoki vafot etgan bo‘lishi mumkinligi haqida xabarlar tarqalgan edi. 2020-yil oktabrida u Mehnat partiyasiga asos solinganiga 75 yil to‘lishi munosabati bilan o‘tkazilgan harbiy paradda xalqqa murojaat yo‘llagan edi.
