Май охирларида ижтимоий тармоқларда Тошкент вилояти ҳудудидаги Шоввозсой дарёсининг қуйи оқими чиқиндихонага айлангани тасвирланган суратлар тарқалган эди. Вилоят Экология ва атроф-муҳитни муҳофаза қилиш бошқармасининг маълум қилишича, чиқиндилар мутасадди ташкилотлар ҳамкорлигида бартараф этилган.
«Ижтимоий тармоқларда Оҳангарон тумани ҳудудидан оқиб ўтувчи Шоввозсой сойининг қуйи оқимларида турли хилдаги чиқиндилар тўпланиб, атроф-муҳит ҳолатига салбий таъсир кўрсатаётгани ҳақида таъкидлаб ўтилган хабар тарқалган. Ҳолат Тошкент вилояти Экология ва атроф-муҳитни муҳофаза қилиш соҳасидаги назорат бўйича Оҳангарон тумани инспекцияси ходимлари томонидан мутасадди ташкилотлар ҳамкорлигида бартараф этилди», — дейилади хабарда.
Эслатиб ўтамиз, 2020 йилнинг мартида Экология ва атроф-муҳитни муҳофаза қилиш қўмитаси раиси бошчилигидаги мутасаддилар Оҳангаронда жойлашган Тошкент маиший чиқинди полигони ҳамда Яшнобод тумани чиқиндиларни қайта юклаш станциясидаги ҳолатни ўрганган эди. Ўшанда Оҳангарондаги маиший чиқинди полигони санитар ҳолати қониқарсиз эканлиги қайд этилиб, унинг атроф-муҳитга салбий таъсирининг олдини олиш ва ҳудудни ободонлаштириш чора-тадбирлари белгиланганди.
Изоҳ (0)