Бухоро вилояти Жондор туманида ўзганинг пластик картасидаги 1 миллион сўмдан ортиқ хайрия пулларини ўғирлаган шахс қўлга олинди. Бу ҳақда вилояти ИИБ ахборот хизмати хабар берди.
Маълум қилинишича, 9 апрель куни номаълум шахс Жондор тумани «Обод» маҳалласида яшовчи Ҳ.Ш. исмли бетоб шахснинг Ҳиндистонга бориб даволаниши учун пул тўплаш мақсадида эълон қилинган хайрия орқали кўнгилли фуқаролардан йиғилган пулларни ўзлаштиришни режалаштирган.
У дастлаб Ҳ.Ш.нинг номига очилган «Агробанк» пластик картасига банкомат орқали хайрия қилган. Шундан сўнг у янада кўпроқ маблағ ўтказишни ваъда қилган ҳолда пластик картанинг махфий коди ва рақамларини билиб олган ҳамда картага йиғилган 1 миллион 34 минг сўм хайрия пулларини фирибгарлик йўли билан қўлга киритган.
Ҳолат юзасидан номаълум шахсга нисбатан Жиноят кодексининг 168-моддаси (фирибгарлик) 1-қисми билан жиноят иши қўзғатилиб, дастлабки тергов ҳамда тезкор суриштирув ҳаракатлари олиб борилган.
Жиноят иши бўйича вилоят ИИБ ҳамда Жондор тумани Ички ишлар бўлими ходимлари томонидан олиб борилган тезкор суриштирув ҳамда техникавий текширув ҳаракатлари давомида ушбу жиноятни Жиззах вилояти Пахтакор туманида яшовчи 18 ёшли Н.Ш. исмли фуқаро содир этгани аниқланган.
Ҳозирда ушбу шахснинг бошқа фуқароларга нисбатан ҳам худди шу каби ёки виртуал жиноятларнинг бошқа турлари билан боғлиқ жиноятларни содир қилган қилмаганини аниқлаш юзасидан қўшимча тергов ҳамда тезкор суриштирув ҳаракатлари давом эттирилмоқда.
Аввалроқ Тошкент вилоятида Telegram орқали ўзганинг пластик картасидан 2,5 млн сўм ечиб олган 10-синф ўқувчиси ушлангани, Самарқандлик 19 ёшли қиз уч ёшли Эъзозани даволаш учун берилган 25 млн сўмлик хайрия пулларини ўзлаштиришга урингани тўғрисида хабар берилганди.
Изоҳ (0)