Сирдарё вилояти Боёвут туманида эркак ўзи билан бирга яшаган икки нафар қариндошини ўлдириб, жасадларни ёқиб юборди. Бу ҳақда Бош прокуратура «Дарё»га маълум қилди.
Қайд этилишича, 1 июнь куни соат 03:30 ларда Боёвут тумани «Сармич» МФЙ Фитрат кўчаси 23-уйда яшовчи 30 ёшли И.Ҳ. ўзи билан бирга яшаб келган 28 ёшли холаваччаси Н.Ч. билан уй-жой низоси бўйича бўлган ўзаро келишмовчилик сабаб жанжаллашиб қолиб, уни бўғиб қасддан ўлдирган.
Шундан кейин фуқаро И.Ҳ. ўзининг жиноятини яшириш мақсадида хонадон ичкарисида ухлаб ётган 60 ёшли холаси О.Т.ни ҳам қасддан бўғиб ўлдириб, мурдаларни хонадон молхонасига олиб кириб, устиларига кўрпа-тўшак ва сомон ташлаб ёқиб юборган.
Марҳум Н.Ч. ва О.Т.нинг ўлими ҳолати юзасидан судга оид тиббиёт экспертизаси тайинланган.
Мазкур ҳолат юзасидан Боёвут тумани прокурори томонидан фуқаро И.Ҳ.га нисбатан Жиноят кодексининг 97-моддаси 2-қисми «а» банди (қасддан одам ўлдириш) билан жиноят иши қўзғатилиб, гумонланувчи процессуал тартибида ушланган.
Мазкур ҳолат юзасидан Боёвут тумани прокуратураси томонидан дастлабки тергов ҳаракатлари олиб борилмоқда.
Бундан аввал Андижонда 9 ёшли қизни ўлдирганликда айбланиб, вилоят суди томонидан оқланган аёл иши юзасидан прокуратура Олий судга протест киритилгани, Тошкентда 5 ёшли ўғлини уриб ўлдирган спорт мураббийига суд ҳукми ўқилгани ҳамда Андижонлик аёл эри билан жанжаллашиб қолиб, уни пичоқлаб ўлдиргани ҳақида хабар берилганди.
Изоҳ (0)