Buxoro viloyati Jondor tumanida o‘zganing plastik kartasidagi 1 million so‘mdan ortiq xayriya pullarini o‘g‘irlagan shaxs qo‘lga olindi. Bu haqda viloyati IIB axborot xizmati xabar berdi.
Ma’lum qilinishicha, 9-aprel kuni noma’lum shaxs Jondor tumani “Obod” mahallasida yashovchi H.Sh. ismli betob shaxsning Hindistonga borib davolanishi uchun pul to‘plash maqsadida e’lon qilingan xayriya orqali ko‘ngilli fuqarolardan yig‘ilgan pullarni o‘zlashtirishni rejalashtirgan.
U dastlab H.Sh.ning nomiga ochilgan “Agrobank” plastik kartasiga bankomat orqali xayriya qilgan. Shundan so‘ng u yanada ko‘proq mablag‘ o‘tkazishni va’da qilgan holda plastik kartaning maxfiy kodi va raqamlarini bilib olgan hamda kartaga yig‘ilgan 1 million 34 ming so‘m xayriya pullarini firibgarlik yo‘li bilan qo‘lga kiritgan.
Holat yuzasidan noma’lum shaxsga nisbatan Jinoyat kodeksining 168-moddasi (firibgarlik) 1-qismi bilan jinoyat ishi qo‘zg‘atilib, dastlabki tergov hamda tezkor surishtiruv harakatlari olib borilgan.
Jinoyat ishi bo‘yicha viloyat IIB hamda Jondor tumani Ichki ishlar bo‘limi xodimlari tomonidan olib borilgan tezkor surishtiruv hamda texnikaviy tekshiruv harakatlari davomida ushbu jinoyatni Jizzax viloyati Paxtakor tumanida yashovchi 18 yoshli N.Sh. ismli fuqaro sodir etgani aniqlangan.
Hozirda ushbu shaxsning boshqa fuqarolarga nisbatan ham xuddi shu kabi yoki virtual jinoyatlarning boshqa turlari bilan bog‘liq jinoyatlarni sodir qilgan qilmaganini aniqlash yuzasidan qo‘shimcha tergov hamda tezkor surishtiruv harakatlari davom ettirilmoqda.
Avvalroq Toshkent viloyatida Telegram orqali o‘zganing plastik kartasidan 2,5 mln so‘m yechib olgan 10-sinf o‘quvchisi ushlangani, Samarqandlik 19 yoshli qiz uch yoshli E’zozani davolash uchun berilgan 25 mln so‘mlik xayriya pullarini o‘zlashtirishga uringani to‘g‘risida xabar berilgandi.
Izoh (0)