Texasda kuzatilgan rekord darajadagi sovuq ob-havo WTI markasidagi neftning narxiga ta’sir qildi

O‘tgan hafta oxirida AQShning Texas shtatiga Arktika sikloni kirib keldi va mamlakat tarixida ilk bora Texasning barcha 254 shahrida kuchli qor bo‘roni bo‘lishi haqida ogohlantirishlar berildi. Qor bo‘ronlaridan tashqari havo harorati ham rekord darajada pasayib ketdi — shtatning ayrim hududlarida 1989-yildan beri ilk bor rekord qayd etilib, 18 daraja sovuq kuzatildi, deya xabar bergan “Kommersant”.

Shtatning eng katta shaharlaridan biri bo‘lga Dallasda 14-fevral, yakshanba kuni 10 daraja sovuq iqlim hukmronlik qildi, AQShning shimoliy shtati bo‘lgan Alyaskaning Ankorija shahridan (8 daraja sovuq) ham sovuqroq bo‘ldi.

AQSh OAVning xabar berishicha, Dallasda fevral oyida odatda havo harorati 10—15 daraja iliq bo‘lar edi.

Meteorologlar Texasdagi sovuq ob-havoni Kanadadan kelgan arktik siklon bilan bog‘liqligini bildirgan. Havoning keskin pasayishi janubiy shtatning infratuzilma obyektlariga ziyon yetkazgan, jumladan, kuchli shamol, sovuq havo va qor bo‘ronlari tufayli elektr energiyasi va transport tizimida muammolar yuzaga kelgan. Texasda havoning birdaniga sovib ketishi yonilg‘iga bo‘lgan talabning oshishiga olib keldi. WTI (West Texas Intermediate) markasidagi neft narxi 2 foizga oshdi va barrel uchun 60,6 dollarga baholandi, bu 2020-yil yanvaridan beri mazkur neft turi uchun belgilangan eng qimmat narx hisoblanadi.

Argus ekspertlarining qayd etishicha, Brent markasidagi neftning kotirovkalari 2,1 foizga ko‘tarilgan va oxirgi 13 oy ichidagi eng yuqori cho‘qqi — 63,76 dollarga chiqqan. Mutaxassislarning ta’kidlashicha, neft narxi nafaqat AQShdagi sovuq ob-havo, balki COVID-19 pandemiyasidan keyin jahon iqtisodiyotining asta-sekin tiklanishni boshlagani uchun ham ko‘tarilgan. Shuningdek, OPEK ittifoqiga kiruvchi davlatning neft ishlab chiqarishni kamaytirgani ham narxlarning ko‘tarilishiga turtki bergani taxmin qilinmoqda.

Avval Istanbulda kuchli qor yog‘ishi tufayli barcha o‘quv muassasalari yopilgani, Germaniyada sovuq havo va qor yog‘ish bo‘yicha yangi rekord qayd etilgani haqida xabarlar berilgan.