Россиянинг Барнаул шаҳридаги савдо маркази ёнида шишириладиган батут ағдарилиши туфайли икки нафар қизча оғир аҳволда касалхонага ётқизилди. Бу ҳақда Meduza хабар берди.
Гувоҳларнинг сўзларига кўра, маҳкамлагичлари узилиб кетгани тахмин қилинаётган батут ҳавога кескин кўтарила бошлаган. Оқибатда батут устида ўйнаётган икки қизча учиб кетиб, тўсиқ ортидаги трамвай рельсларига бориб тушган.
«ТАСС»нинг шаҳар фавқулодда хизматларидаги манбаси хабар беришича, батут ҳаво босимига дош беролмай ёрилиб кетган. Ҳокимлик матбуот хизмати ўз навбатида батут кучли шамол натижасида ағдарилиб кетганини айтди.
Жабрланувчилар — уч ва тўрт ёшли қизлар. Уларга бош суяги ва умуртқа поғонаси синиши, ўпка ва қорин бўшлиғи травмасı ташхиси қўйилган. Шу билан бирга ҳодиса чоғида батутда бўлган яна икки нафар бола ундан сакраб чиқишга муваффақ бўлгани айтилмоқда.
Ҳодиса юзасидан Тергов қўмитаси хавфсизлик талабларига жавоб бермайдиган хизматларни кўрсатиш бўйича жиноий иш қўзғатди (Россия Жиноят кодексининг 238-моддаси). Хабарларга кўра, батут маҳаллий якка тадбиркорга тегишли.
Изоҳ (0)