Жонс Ҳопкинс университети маълумотларига кўра, бутун дунёда пандемия бошидан буён 168 979 381 киши коронавирус билан касалланган, шуларнинг 3 511 570 нафари вафот этган. Касалланиш ҳолатларининг кўплиги бўйича АҚШ (33,2 миллион), Ҳиндистон (27,5 миллион), Бразилия (16,3 миллион), Франция (5,6 миллион) ва Туркия (5,2 миллион) олдинда бормоқда.
Ҳиндистонда коронавируснинг янги штамми аниқланди
Ҳиндистоннинг Ғарбий Бенгалия штатида тиббиёт мутахассислари коронавируснинг шу пайтгача номаълум бўлган штаммини аниқлади. Унинг геноми SARS-CoV-2’нинг Британия ва Жанубий Африка вариантларига тааллуқли бўлган бирйўла бир нечта асосий мутацияларни ўз ичига олади.Коронавируснинг потенциал хавфли вариант Калкуттадаги Холера ва ичак касалликларини ўрганиш миллий институти олимлари томонидан кашф қилинди. Таъкидланишича, янги COVID-19 тури Ҳиндистон ғарбида пайдо бўлган.
Мутахассислар мамлакатнинг турли ҳудудларида яшовчи коронавирус аниқланган икки мингдан ортиқ одамларнинг биологик суюқлиги намуналарини тадқиқ қилиб чиқди. Ғарбий Бенгалиядан келган намуналарнинг 16 фоизга яқини COVID-19’нинг шу пайтгача номаълум бўлган штамми бўлиб чиқди.
Олимлар вируснинг янги ва хавфлироқ вариациялари энди тобора кўпроқ пайдо бўла бошлашидан огоҳлантирди.
«Бизнинг тахминимизча, бу мутациялар SARS-CoV-2’нинг ушбу турини янада юқумлироқ ҳамда иммунитет учун сезиларсизроқ қилиши керак. Бу унинг Ғарбий Бенгалия ҳудуди бўйлаб тарқалишида ёрдам бериши мумкин… Коронавируснинг бу штамми Ҳиндистондаги эпидемиологик вазиятни янада мураккаблаштириши мумкин», — дея қайд этди тадқиқот муаллифлари.
Францияда COVID-19’га қарши эмланиш мажбурий бўлиши мумкин
Франция президенти Эммануэль Макрон фуқароларнинг алоҳида гуруҳлари учун коронавирусга қарши эмланиш мажбурий қилиб қўйилиши мумкинлигини айтди.«Барча эшиклар очиқ қолмоқда», — деди давлат раҳбари журналистлар мажбурий вакцинация борасидаги фикрларини сўраганидан кейин.
Бир неча кун аввал Франция Миллий тиббиёт академияси COVID-19’га қарши мажбурий вакцинацияни жорий қилишни тавсия этган эди. Таъкидланишича, биринчи босқичда у касалланиш бўйича жиддий хавф остида бўлган муайян касб эгалари учун, ундан кейин эса жамоавий иммунитетга эришиш йўлида мамлакатнинг бутун аҳолиси учун зарур бўлади.
Шу билан бирга, ўтган йилнинг 24 ноябрида телемурожаати чоғида Макрон мамлакат ҳудудида мажбурий вакцинация жорий этилмаслигига ишонтирган эди.
Мавзуга доир: Ёқутистон Россия ҳудудлари ичида биринчи бўлиб коронавирусга қарши мажбурий эмлашни жорий қилди
Аргентинада бир кунда рекорд даражада кўп одам COVID-19’ни юқтириб олди
Аргентинада коронавирус билан касалланганлар сони бир кеча-кундузда 41 мингдан зиёдга кўпайди, бу пандемия бошидан буён мамлакатда кузатилган энг юқори кўрсаткич. Шу тариқа жами касалланганлар сони 3,6 миллиондан ошди.Бир кунда 41 080 кишида COVID-19 аниқланган, бундан аввалги рекорд 19 майда қайд этилган (39 652). Пандемия бошидан буён 3 663 215 киши вирусга чалинган. Ўтган 24 соат ичида касалликдан 551 киши вафот этган, жами ўлим ҳолатлари сони эса 76 135 тага етди.
Аргентинада коронавирусга қарши эмлаш 2020 йил охирида бошланган, мамлакатда Россиянинг «Спутник V» вакцинаси маъқулланган.
Мавзуга доир: Аргентинада коронавирус сабаб футбол мусобақалари тўхтатилди. Ёзда у ерда Копа Америка—2021 бўлиб ўтади
- Парижда 29 май куни машҳур Индочине гуруҳи иштирокида махсус «синов концерти» бўлиб ўтади. Ундан мақсад шундай оммавий тадбирлар ўтказилганда коронавирус билан касалланиш хавфи ошиш-ошмаслигини аниқлаш. Концертда беш минг нафар кўнгилли иштирок этади, улар манфий натижали тестни тақдим этиши ҳамда шоу вақтида ниқоб тақиши керак бўлади.
- Германияда июндан 12—16 ёшли болалар учун коронавирусга қарши эмланиш учун рўйхатдан ўтиш бошланади. Ёз охирига келиб эса мамлакатнинг эмланиш истагидаги барча фуқаролари вакцина олиш имкониятига эга бўлади.
- Касалланиш суръатларининг пасайиши фонида Кипр ҳукумати эпидемиологик чекловларни юмшатишга қарор қилди. Хусусан, 10 майдан комендантлик соати бекор қилинади. 26 май куни Кипрда бор-йўғи 69 киши COVID-19’га чалинган.
Изоҳ (0)