Наманганда ўтказилаётган Халқаро гуллар фестивалида Давлат хизматлари агентлиги вилоят бошқармаси ҳам алоҳида павильон билан иштирок этмоқда. Бу ҳақда «Дарё» мухбири Азизбек Абдувалиев хабар берди.
Павильонда давлат хизматлари агентлиги рамзи туширилган гул композицияси яратилиб, шу ернинг ўзида аҳолига хизмат кўрсатилмоқда. Кадастр паспортини тайёрлаш, пенсия олиш ва фуқароларни қизиқтирган бошқа кўплаб йўналишлар юзасидан маслаҳат ва амалий ёрдам берилмоқда.
Хусусан, ДХА вилоят бошқармаси томонидан туғилганлик гувоҳномасини ўз вақтида олмаган 21 нафар фуқарога бу ҳақдаги ҳужжат ва эсдалик совғалари топширилди. Улар орасида қарийб 14 йилдан буён туғилганлиги қайд этилмаган Ойдина Абдуллажонова ҳам бор.
Гуллар фестивали доирасида Наманган шаҳрининг Давлатобод туманида истиқомат қилувчи Александр Йўлдошев ва Муслимахон Исабоеванинг никоҳ гувоҳномалари ҳам тантанали тарзда топширилди.
Уларни нафақат яқинлари, балки байрамга келган хорижлик меҳмонлар ҳам қутлади.
«Турмуш ўртоғим билан тўйимиз бўлишидан аввал биз ҳам барча ёшлар қатори чиройли орзу-ниятлар қилган эдик. Лекин бу даражада эсда қоларли бўлади, гуллар фестивалида, кўплаб меҳмонлар иштирокида никоҳимиз қайд этилади деб ўйламагандик. Мен ва аёлимнинг қувончининг чеки йўқ, ўзимизни энг бахтли келин-куёвлардан санаяпмиз», — дейди Александр Йўлдошев.
Изоҳ (0)