Тошкент шаҳрида Николай Пирогов номидаги Россия миллий илмий-текшириш тиббиёт университетининг филиали очилиши режалаштирилмоқда, дея хабар берди ССВ матбуот хизмати.
Вазир Михаил Мурашко бошчилигидаги Россия Соғлиқни сақлаш вазирлиги делегациясининг Ўзбекистонга ташрифи доирасида Чилонзорда Россия миллий илмий-текшириш тиббиёт университетининг филиалини очиш масаласига эътибор қаратилди.
Бу борада 28 май куни Соғлиқни сақлаш вазирлиги ва Николай Пирогов номидаги Россия миллий илмий-текшириш тиббиёт университети ўртасида ҳамкорлик тўғрисида келишув имзоланди.
Ҳамкорлик дастурини амалга оширишнинг биринчи босқичи доирасида Тошкент шаҳрида юқорида айтиб ўтилган Россия университетининг ординатурада (кейинчалик аспирантурада) юқори малакали кадрлар тайёрлаш ва тиббиёт ходимларига қўшимча касбий таълим бериш бўйича филиалини очиш режалаштирилган.
Делегация аъзолари клиник базалар сифатида танланган ушбу тиббиёт муассасаларига ҳам ташриф буюрди.
Университет филиалини жойлаштириш учун таълим фаолиятини амалга оширишда зарур бўлган бинолар мажмуасига эга бўлган ва белгиланган клиник базалар яқинида жойлашган Чилонзор тиббиёт коллежи танланган.
Филиал бинолари ва иншоотларини реконструкция қилиш (қуриш) ҳамда ўқув ва симуляция ускуналари билан жиҳозлаш билан бир қаторда Республика шошилинч тиббий ёрдам илмий маркази ва Республика ихтисослаштирилган хирургия илмий-амалий тиббиёт марказини ҳам юқори малакали шифокорларни тайёрлаш учун зарур бўлган замонавий тиббиёт юқори технологик ускуналари билан жиҳозлаш режалаштирилган.
Лойиҳани амалга ошириш натижасида РШТЁИМ, РИХИАТМ Россия университетининг филиали билан биргаликда Ўзбекистоннинг етакчи консультатив, тиббий (кейинчалик илмий) ва ўқув марказларига айланади.
Талабаларни ординатура (кейинчалик аспирантура)га ўқишга қабул қилиш мамлакатдаги тиббиёт олий ўқув юртлари битирувчилари ўртасида танлов эълон қилиш йўли билан амалга оширилади.
Университет филиалининг профессор-ўқитувчилар таркиби Россия университети ходимлари, мамлакат мутахассислари ва келажакда филиалнинг энг яхши битирувчиларидан шакллантирилади.
Бундан аввал Янги Ўзбекистон университети ташкил қилиниши, Тошкентда Венгриянинг Дебрецен университети филиали очилиши ҳамда Жиззахда Ҳиндистоннинг Sambhram технология институти филиали очилиши ҳақида хабар берилганди.
Изоҳ (0)