Қашқадарё вилоятининг Қамаши туманида МИБ ходимининг қонуний фаолиятига тўсқинлик қилган 29 ёшли фуқаро қамоққа олинди. Бу ҳақда «Дарё»га МИБ вилоят бошқармаси ахборот хизмати раҳбари Гулноза Дилмуродова хабар берди.
Маълум бўлишича, бюронинг Қамаши туман бўлими иш юритувига туман маъмурий судининг 2019 йил 29 октябрдаги қарорига асосан қарздор Н.Қ.дан давлат фойдасига 669 минг сўм маъмурий жарима ундириш тўғрисидаги иш келиб тушган.
«Қарздор ушбу маъмурий жаримани орадан 2,5 йил вақт ўтган бўлса-да, тўламасдан келган. Шу сабабли, давлат ижрочилари жорий йилнинг 24 май куни туманнинг Тегирмонқул қишлоғида жойлашган қарздорнинг яшаш манзилига бориб, қарздорлик эвазига бир дона Roison русумли телевизорини хатлаб олган. Сўнгра ушбу қишлоқ ҳудудида бошқа ижро ҳаракатларини амалга ошираётган вақтда уларнинг ортидан қарздорнинг укаси, онаси ва келинойиси бориб, МИБ ходимларини ҳақорат қилган. Хатлаб олинган телевизорни қайтариб беришини айтиб, жанжал кўтарган. Шунингдек, бюро ходимлари қайтиб келаётганда қарздор ва унинг отаси йўлнинг қатнов қисмида ёғоч нарвон билан МИБ ходимлари бошқарувида бўлган Nexia-3 автомашинасининг олдини тўсиб, нарвонни автомашинанинг олд қисмига улоқтирган ҳамда автомашинани тўхтатиб олиб, давлат ижрочиларига енгил тан жароҳати етказган», — дейди Гулноза Дилмуродова.
Айтилишича, шундан сўнг қарздорнинг укаси ўзи билан олиб келган темир (лом) жисмни кўрсатиб, МИБ ходимларига ушбу жисм билан тан жароҳати етказишини айтиб, уларни қўрқитган ва хатлаб олинган телевизорни қайтариб олган.
«Ҳодиса жойи Қамаши туман прокуратураси терговчиси ва туман ИИБ тезкор ходимлари томонидан кўздан кечирилиб, процессуал тартибда ҳужжатлар расмийлаштирилган. Ҳолат юзасидан туман прокуратураси томонидан 2021 йил 26 май куни қарздор Н.Қ. ва бошқаларга нисбатан Жиноят кодексининг 219-моддаси 2-қисми (ҳокимият вакилига ёки фуқаровий бурчини бажараётган шахсга қаршилик кўрсатиш, қандай шаклда бўлмасин ўзининг хизмат вазифасини бажариш ёки фуқаровий бурчини бажаришдан воз кечишга, шунингдек, қонунга хилоф ҳаракатлар содир этишга мажбур қилиш) билан жиноят иши қўзғатилган ҳамда Н.Қ. Жиноят-процессуал кодексининг 221-моддаси тартибида ушланган.
Эслатиб ўтамиз, мазкур модда билан айбланган фуқаронинг айби тасдиқланса, у уч йилгача ахлоқ тузатиш ишлари ёки икки йилдан беш йилгача озодликни чеклаш ёки беш йилгача озодликдан маҳрум қилиш билан жазоланади.
Изоҳ (0)