2021 йил якунигача 212 та авария ҳолатидаги 2 қаватли уйлар реновация асосида янгидан қурилади. Бу ҳақда айни пайтда Президент Шавкат Мирзиёев раислигида ўтказилаётган йиғилишда давлат раҳбари сўз юритди, дея хабар бермоқда «Дарё» мухбири.
«Янги қурилган 3 мингта кўп квартирали уй-жойларга хизмат кўрсатиш йўлга қўйилмаган. Жумладан, Тошкент вилоятида – 623 та, Бухорода – 621 та, Хоразмда – 249 та, Сурхондарёда – 195 та ва Наманганда – 170 та кўп қаватли уйларга бошқарувчилар бириктирилмаган.Шунинг учун Шерзод Ҳидоятов, Ботир Зокиров бир ой муддатда қурувчи ташкилот янги қурилган кўп қаватли уйларни, бошқарув компанияси ташкил қилган ҳолда, икки йил давомида сақлашни ўз зиммасига олишини назарда тутувчи тизим ярацин. Тошкент вилояти ҳокими Даврон Ҳидоятов вилоят, туман ва шаҳар ҳокимлари билан бирга йил якунигача ходимлар малакасини ошириш бўйича ҳар бир бошқарув компанияларнинг ўзида ўқув марказларини ташкил этсин.
Шунингдек, жорий йилда 212 та авария ҳолатидаги 2 қаватли уйларни реновация асосида янгидан қуришга вазир ўринбосари уй-жой коммунал хизмат кўрсатиш вазири ўринбосари Назиржон Назиров вилоят, туман ва шаҳар ҳокимлари билан бирга шахсан масъул бўлади.
Жумладан, 40 фоиз (14 мингта) кўп квартирали уйларнинг фойдаланиш муддати ўтган, қарийб 7 мингтаси таъмирталаб ва 668 таси авария ҳолатида, шундан 212 таси яшашга яроқсиз. Ушбу яроқсиз уйларнинг тенг ярми (106 та) Қорақалпоғистонга тўғри келса, Бухорода – 28 та, Тошкент вилоятида – 25 та ва Тошкент шаҳрида – 23 тани ташкил этади. Тахиатош (31 та уй), Қўнғирот (30 та), Хўжайли (20 та) туманлари, Бухоро (28 та) ва Чирчиқ (15 та) шаҳарларида энг оғир аҳвол», — деди Президент.
Таъкидланишича, жорий йилда Қорақалпоғистон (20 та), Андижон (4 та), Бухоро (28 та), Наманган (5 та), Сурхондарё (4 та), Тошкент вилояти (17 та), Хоразм (3 та), Фарғона (1 та) ва Тошкент шаҳри (23 та) ҳокимлари жами 105 та яроқсиз уйлар ўрнига, тадбиркорлар томонидан янги кўп қаватли уй-жойлар қуриб бериш ташаббусини билдирган.
Мавзуга доир:
Изоҳ (0)