Ҳаракатланаётган автомобиль люкига ўтириб олиб, қоидабузарлик содир этган қиз Жиззах вилояти ИИБ томонидан жаримага тортилди, деб хабар беради ИИВ ЙҲХББ ахборот хизмати.
23 май куни ижтимоий тармоқларда Жиззах вилояти ҳудудидан ўтган автомобиль йўли бўйлаб ҳаракатланаётган Lacetti машинаси ичида бўлган йўловчи қиз автомобиль люкига ўтириб олгани тасвирланган видео тарқалди. Вилоят ИИБ ходимлари томонидан олиб борилган суриштирув ишлари давомида қоидабузарларнинг шахсига аниқлик киритилган.
Йўловчи қизга нисбатан Маъмурий жавобгарлик тўғрисидаги кодекснинг 138-моддаси (транспорт воситаси ҳаракатланаётган вақтда йўловчи томонидан тана қисмларини (қўлдан ташқари) салондан чиқариш) билан маъмурий баённома тузилиб, БҲМнинг 1 баравари (245 минг сўм) миқдорида жаримага тортилган.
«Узр сўрайман. Автомобиль эгаси рулда эмасди, Вали исмли танишим билан эдик. Автомобиль эгаси, рафиқаси, оила аъзоларидан узр сўрайман. Қўлларидан келса, кечиришсин. Мени деб битта оила бузилиб кетишини истамайман», — дейди қиз.
Эслатиб ўтамиз, 2020 йилнинг февралида Тошкентда автомашинанинг люк қисмидан икки қизни ярим-ялонғоч чиқариб олиб, ҳаракатланган Lacetti ҳайдовчиси жаримага тортилганди.
Изоҳ (0)