25 май куни Вазирлар Маҳкамаси ҳудуди олдида меҳрибонлик уйларининг собиқ тарбияланувчиларига ички ишлар ходимлари томонидан куч ишлатилгани айтилаётгани ҳақида хабар берилган эди. «Gazeta.uz» Вазирлар Маҳкамасига таяниб, ушбу воқеа тафсилотлари бўйича изоҳ берди.
Маълумотга кўра, Самарқанд вилояти Самарқанд шаҳридаги Қорасув массивида истиқомат қилувчи Наргиза Жўрақулова ва 7 нафар фуқаро (собиқ меҳрибонлик уйи тарбияланувчилари) Олий Мажлис Сенатига мурожаат қилиб келган. Фуқаролар масалаларини кўриб чиқиш учун Вазирлар Маҳкамаси биноси олдига таклиф этилган.
Вазирлар Маҳкамаси аппарати ходими Ш.Салиевнинг маълум қилишича, пандемия давридаги эпидемиологик-санитария шароитлари сабабли, фуқароларнинг қабули ҳукумат биносида эмас, бино ташқарисида, Вазирлар Маҳкамаси ҳудуди олдида амалга оширилади.
Қабул жараёнида фуқаролар томонидан Ўзбекистон Миллий банкидан уй-жой сотиб олиш учун олинган ипотека кредитларини тўлай олмасликлари сабабли тўлов фоизларини камайтириб бериш ҳамда муддати ўтказиб юборилган қарздорликни қоплаш тўғрисидаги масалалар кўтарилган.
Ҳукуматнинг масъул ходимлари фуқароларга ушбу масалаларнинг ечими бўйича ҳозирда Марказий банк ҳамда Молия вазирлиги томонидан ҳужжат лойиҳаси ишлаб чиқилиб, вазирлик ва идоралар билан келишиш жараёнида экани бўйича тушунтириш берган.
Вазирлар Маҳкамаси ходимларининг таъкидлашича, фуқаролар қабул жараёнида масалалар бўйича берилган тушунтиришлардан қониқиш ҳосил қилган.
Шундан сўнг, мурожаатчилар масала ҳал бўлмагунча Вазирлар Маҳкамаси ҳудудини тарк этмаслигини, вилоятга қайтиб борса вилоят ҳамда шаҳар ҳокимликлари уларга ёрдам кўрсатмаслигини таъкидлаган. Собиқ меҳрибонлик уйи тарбияланувчилари Вазирлар Маҳкамаси уларнинг ҳар бирига 100 миллион сўмдан пул тўлаб бермаса, Самарқанд вилоятига қайтиб кетмаслиги ҳақида шарт қўйгани айтилмоқда.
Наргиза Жўрақулова рухсатсиз видеога олишни бошлаганида ҳудудга хизмат бўйича бириктирилган ИИВ ходимлари унга тасвирга олиш мумкин эмаслиги, бу стратегик объект эканини тушунтириб, огоҳлантириш беради. Жўрақулова огоҳлантиришга қарамасдан тасвирга олишда давом этади.
Унинг ушбу ҳаракатини тўхтатиш мақсадида фуқаролик кийимида бўлган ИИВ ходими, майор А.Халилов Жўрақулованинг қўлидан мобил телефонини олиб қўйишга ҳаракат қилади. Шунда Жўрақулова ИИВ ходимининг қўлига ёпишиб, қўлларини тирнаб, тишлашга уриниб, унга тан жароҳати етказади, дея таъкидлайди Вазирлар Маҳкамаси ходими.
Ушбу тортишувга Жўрақулова билан бирга келганлар ҳам аралашганда, воқеа жойида бўлган ИИВ ходимлари уларни ажратишни бошлайди.
Тортишув биринчи маротаба бартараф этилгач, мурожаатчилар тинчлантирилиб, ҳукумат ходимлари уларга тушунтиришни давом эттирмоқчи бўлганида Н.Жўрақулова яна телефонига тасвирга олишни бошлайди. ИИВ ходимлари иккинчи маротаба унинг телефонини тортиб олмоқчи бўлишганида, яна тортишувлар бошланиб кетади.
Вазирлар Маҳкамаси ходимининг айтишича, Н.Жўрақуловани ички ишлар ходими ерга йиқитмаган, судрамаган, аксинча, фуқаронинг ўзи ерга ётиб олиб, оёқлари билан уни олиб кетмоқчи бўлганларни тепган.
Ҳолат кескинлашиб кетишининг олдини олиш мақсадида ички ишлар ходимлари томонидан эҳтиёт чоралари кўрилган ҳолда Н.Жўрақулова ва тортишувга аралашган яна 5 нафар фуқаро Тошкент шаҳар Юнусобод тумани ИИО ФМБга олиб кетилган.
Ички ишлар ходимларидан бири нега фуқаролик кийимида бўлгани бўйича ҳам Вазирлар Маҳкамаси ходими изоҳ берган. «Вазирлар Маҳкамаси ҳудуди олдида бир гуруҳ фуқаролар йиғилса, хавфсизликни таъминлаш мақсадида ички ишлар ходимлари навбатчиликда бўлади», — дейди у.
Фуқароларнинг ИИО биносида 10 соатгача ушлаб турилишига суриштирув ишлари амалга оширилиши, ҳодиса иштирокчиларига тиббий хулосалар олиниши, улардан тушунтириш хатлари ва кўрсатмалар олиниши ҳамда бошқа расмийлаштириш ишлари сабаб бўлгани қайд этилади.
Вазирлар Маҳкамаси ходимининг таъкидлашича, меҳрибонлик уйлари собиқ тарбияланувчиларининг ИИО ФМБ биносида уларга овқат берилмагани ҳақидаги иддаоси ҳам ҳақиқатга яқин эмас. «Уларга ички ишлар ходимлари сомса олиб берган. Кейин ИИО биносидан биринчи қўйиб юборилган фуқаролар бошқаларга юборган овқат, сендвичлар уларга етказилган», — дейди у.
Вазирлар Маҳкамаси ходимлари мурожаатчиларга нисбатан ҳақоратомуз сўзлар ишлатилмаганини таъкидлаган. Хусусан, фуқароларга нисбатан «Сенлар етимсанлар. Етимларга қанча берсанг, шунча тўймайди, ношукурсанлар» деган сўзлар ишлатилмагани айтилмоқда.
Маълумотга кўра, ушбу ҳолат Вазирлар Маҳкамаси биносининг ташқи томонига Ички ишлар идоралари томонидан ўрнатилган видеокамераларга тасвирга туширилган, ҳолат бўйича Тошкент шаҳар ИИББ томонидан хизмат текшируви ўтказилиб, ҳолат юзасидан расмийлаштирилган ҳужжатлар жиноят ишлари бўйича Юнусобод туман судига тақдим этиш учун тайёрланган.
Аввалроқ Самарқанддаги мактаб-интернатнинг тарбияланувчилари калтаклангани айтилган хабар тарқалганди. Мазкур ҳолат Сенатнинг Фан, таълим ва соғлиқни сақлаш масалалари қўмитаси томонидан назоратга олинган. Тегишли идораларга ушбу масала қонуний кўриб чиқилиши юзасидан кўрсатмалар берилган.
Изоҳ (0)