Сурхондарёда Термиз тумани суди раиси хизмат хонасига бостириб кириб, суд мажлисида иштирок этиш ва жараённи тасвирга олишни талаб қилган «Effect.uz» сайти ходимлари иши юзасидан суд ишлари бошланди, дея хабар бермоқда Олий суд ахборот хизмати.
Қашқадарё вилоят судида судланувчилар Ҳ.А. (1987 йилда Фарғона вилоятида туғилган, «Effect.uz» веб-сайти мухбири), А.Н. (1982 йилда Навоий вилоятида туғилган, «Effect.uz» веб-сайти мухбири) ва Э.Т. (1990- йилда Фарғона вилоятида туғилган, «Effect.uz» веб-сайти мухбири)га нисбатан жиноят ишини кўриб чиқиш бўйича очиқ суд ўтказилди.
Ушбу жиноят иши Қашқадарё вилоят суди судьяси Н. Абдуллаев раислигида кўрилди.
Судланувчилар Ҳ.А. Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) ва 236-моддаси (тергов қилишга ёки суд ишларини ҳал этишга аралашиш), А.Н. Жиноят кодексининг 139-моддаси (туҳмат), 140-моддаси (ҳақорат қилиш), 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) ва 236-моддаси (тергов қилишга ёки суд ишларини ҳал этишга аралашиш) ва Э.Т. Жиноят кодексининг 139-моддаси (туҳмат), 140-моддаси (ҳақорат қилиш), 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) ва 236-моддаси (тергов қилишга ёки суд ишларини ҳал этишга аралашиш) да назарда тутилган жиноятларни содир этганликда айбланмоқда.
Суд жараёни давом этмоқда. Кейинги суд мажлиси 31 май куни ўтказилиши белгиланди.
Эслатиб ўтамиз, 6 апрель куни «Effect.uz» ахборот агентлигининг 2 нафар мухбирига нисбатан Жиноят кодексининг 219 ва 236-моддалари билан сиртдан айб эълон қилиниб, суднинг ажрими билан қамоққа олиш эҳтиёт чораси қўлланилган ва уларга нисбатан қидирув эълон қилинганди.
Бунга 2021 йилнинг январь ойида «Effect.uz» нашрининг ходимлари жиноят ишлари бўйича Термиз туман суди раиси хизмат хонасига бостириб кириб, суд мажлисида иштирок этиш ва жараённи тасвирга олишни талаб қилгани тасвирланган видеоёзув тарқалгани сабаб бўлган. Видеоёзувда қайд этилган ҳолатга ҳуқуқий баҳо бериш мақсадида Судьялар олий кенгаши раиси томонидан бош прокурор номига тақдимнома киритилган.
Изоҳ (0)