Қорақалпоғистонда «Ўзбекистон Қизил китоби»га киритилган жайронларни ноқонуний равишда овлаган шахсларга чора кўрилди, дея хабар бермоқда Экология қўмитаси.
Орол табиатни муҳофаза қилиш прокуратураси ва Қорақалпоғистон Экология қўмитаси ҳамда «Жанубий Устюрт» миллий табиат боғининг давлат инспекторлари, Қўнғирот туман ИИВ, Миллий гвардия бошқармасининг ҳарбий хизматчилари билан ҳамкорликда экологик жиноятлар ва ҳуқуқбузарликларнинг олдини олиш юзасидан назорат тадбири ўтказилди.
Ўрганишлар жараёнида Қўнғирот туманидаги «Жаслиқ» МФЙда яшовчи Т.Б. ва Б.Р. томонидан Устюрт текислигида ноқонуний равишда «Қизил китоб»га киритилган сут эмизувчилар тоифасига кирувчи 11 бош жайронини овлагани ҳамда ёнларида 11 жуфт шох борлиги аниқланди.
Мазкур ҳолат бўйича барча ҳужжатлар расмийлаштирилиб тергов, суриштирув ишларни олиб бориш учун Орол табиатни муҳофаза қилиш прокуратурасига ўтказилди.
Бундан аввал Жиззахда овлаш тақиқланган балиқларни овлаган шахсга нисбатан жиноят иши қўзғатилгани, Жиззахда электр қармоқда балиқ овлаб, ҳайвонот дунёсига 10 млн сўм зарар етказган шахсларга чора кўрилгани ҳамда Бухорода ноқонуний равишда ёввойи қуён овлаган браконьерлар қўлга олингани ҳақида хабар берилганди.
Изоҳ (0)