Самарқандда икки йигитга Қозоғистондаги институтлардан бирида ўқиётганлиги ҳақида сохта ҳужжат тайёрлаб бермоқчи бўлган фуқаролар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум бўлишича, фуқаро Б.Т. танишлари орқали фуқаро Ш.нинг укаси ва жиянига Қозоғистондаги институтларнинг бирида 2020 йилнинг сентябрь ойидан ўқиётганлиги тўғрисида ҳужжатларни тайёрлаб беришни ваъда қилган. Эвазига 4 200 доллар сўраган.
Пулларни олаётганида Бош прокуратура ҳузуридаги департамент ҳамда ДХХнинг Каттақўрғон шаҳар бўлимлари томонидан ўтказилган тезкор тадбирда ушланган.
Унинг кўрсатувларига асосан тадбир давом эттирилганда, Тошкент ахборот технологиялари университетининг Самарқанд филиалида бўлими бошлиғи лавозимида ишловчи М. фуқаро Б.Т.дан 3000 долларни фирибгарлик йўли билан олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, прокуратурага юборилган.
Аввалроқ Самарқандда ҳарбий олийгоҳлар ва Темурбеклар мактабига ўқишга киритишини айтиб, фуқаролардан қарийб 10,5 минг доллар пул олган аёл ушлангани, Тошкент ирригация институтига ўқишга киритиш учун 5 минг доллар сўраган шахс қўлга олингани, Ангренда 3,5 минг доллар эвазига Жисмоний тарбия университетига киритиб қўймоқчи бўлган шахс қўлга тушгани ҳақида хабар берилган эди.
Изоҳ (0)