«Сумерки» юлдузи Роберт Паттинсон Warner Bros. кинокомпаниясида продюсер сифатида иш бошлайди

35 ёшли британиялик актёр Роберт Паттинсон Голливуднинг кенг прокат учун фильм ва сериаллар ишлаб чиқарувчи Warner Bros. кинокомпанияси билан катта келишувга эришди, деб хабар қилмоқда Hello нашри.

Маълум қилинишича, «Сумерки», «Мени эсла» ва «Филлар учун сув!» фильмлари юлдузи Паттинсон эксклюзив ҳуқуққа ёки «биринчи танлов ҳуқуқи»га эга бўлади, яъни у компания раҳбариятига ғояларини шахсан ўзи таклиф қила олади. Шунингдек, у катта бюджетга эга бўлмаган янги истеъдодлар ва қизиқарли лойиҳаларни излайди. Шу билан бирга, Паттинсон актёр сифатида бошқа кинокомпанияларнинг лойиҳаларида иштирок этиши мумкин — унинг фильмлардаги ишининг ушбу қисми шартнома билан тартибга солинмаган ёки чекланмаган.

Ушбу шартнома Паттинсоннинг биринчи йирик продюсерлик шартномаси ҳисобланади. У илгари продюсер сифатида ишлаган, аммо доимий равишда фаолият олиб бормаган: 2010 йилда бош ролни ўзи ўйнаган «Мени эсла» фильмини суратга олган. Актёр Deadline нашрига берган интервьюсида бу унинг ҳаётидаги янги босқич эканини таъкидлаган.

«Warner Bros. Pictures ва HBO доим янги фильмлар яратиш бўйича пешқадам бўлиб келган. Мен улар билан ҳамкорликда янги овозларни кашф этиш ва уларнинг ҳаётий қарашларини амалга оширишда ёрдам беришдан мамнунман. Ўтган йиллар давомида мазкур студия билан ишлаганимдан хурсандман. Уларнинг фидойилиги, таваккал қилишга тайёрлиги ва ижодкорлиги учун жуда ҳурмат қиламан», — деган актёр.

Аввалроқ Голливуд актёрлари Роберт Паттинсон, Юен МакГрегор ва Лили Коллинз янги хайрия ташаббуси яратилишини эълон қилгани хақида хабар қилинганди.