«ЙПХ ходимлари ‘Қалпоқ’нинг аламини мендан олди». Искандар Ҳамроқулов қайси мавзуларда ҳазил қилишдан қўрқиши ҳақида гапирди (видео)

Қизиқчи Искандар Ҳамроқулов YouTube’даги YashinTV каналига интервью берди. У суҳбат давомида қандай мавзуларни саҳнага олиб чиқишни умуман хоҳламаслиги ёки қўрқиши ҳақида гапирди.

Оддий ичкилик масалаларида танқидий ёндaшган ҳолда, зўр кулгига бой материаллар тайёрлаш мумкин. Кулдириб гапиряпсиз-у, лекин бу ерда сатира бор. Бир эркакнинг ичиб келадиган ҳолати, рўзғорига, боласига олиб келадиган гўшт-нонидан кўра ичкиликни устун кўришини кўрсатиб берасиз. Унинг ҳолатини ифодалаб берасиз, лекин ҳозирги томошабинларимиздан менга ичкиликни тарғиб қиляпсан, деган фикрлар кўпаймоқда.

Бундан ташқари, ЙПХ ходимлари билан бўладиган қизиқарли ҳангомалар бор, ҳаётда юз берганлари бор. Лекин мен мана шу ҳажвияларни олиб чиқиб, ижро қилишдан қўрқаман, чунки кўчада юраман, барибир сафарда кўп юрамиз. Биласизми, оддий «Қалпоқ» гуруҳининг ЙПХ ходимларига қилган ҳазилларига мен жамоани тарк этганимга 6-7 йил ошганлигига қарамай, сен ҳам «Қалпоқ»да эдинг деб, уларнинг аламини мендан олган вазиятлар ҳам кўп юз берди. «Акалар, мен у ролда ўйнамаганман, мен алоҳида ижод қиляпман» десам, «Сен ҳам ўшаларнинг бирисан» деб 2-3 марта тазйиқ ҳам қилишган. Шу сабабдан улар билан конфликтга бормоқчи эмасман. Кўчада тинчроқ юрай, асабим бузилмасин, яна хўрланмай деган мақсадда қўрқув бор, яъни шундай мавзуларга қўл урмасликка ҳаракат қиламан. Яна бунга ўхшаш мавзулар бор, лекин айтсам кимларгадир тегиб кетиши мумкин. Бир пастда сен ундай қилибсан, сен бундай қилибсан, деб келиши мумкин.

Аёл образларини ҳеч қанақасига қабул қилолмайман. Аёл кишини хатти-ҳаракатларини қилиб, аёл образини яратиш мумкиндир, лекин мен шунақа нарсаларни ўзимга эп кўрмайман. Аёл кишининг характерини кўрсатиб бериш ёки аёл кишидек гапиришни ҳам хоҳламайман.

Доимо чегарани ушлаймиз: Искандар Ҳамроқуловнинг ижодий маҳсулини, қайнота билан келин бемалол ўтириб кўрсин, она билан ўғил бемалол кўрсин. Бир-биридан хижолат бўлмасин.

Искандар Ҳамроқулов, қизиқчи, «Қалпоқ» кўрсатуви собиқ аъзоси