Сурхондарёда 22 май — Бутунжаҳон биохилма-хилликни асраш куни арчалар оммавий кесилгани ҳақида хабар берилган эди. Вилоят ҳокимлиги ушбу масала атрофлича ўрганиб чиқилганини маълум қилди.
Қайд этилишича, Президентнинг 2020 йил 12 ноябрдаги «Сурхондарё вилояти ва Тошкент шаҳрида махсус иқтисодий ва кичик саноат зоналари фаолиятини янада ривожлантириш чора-тадбирлари тўғрисида»ги фармони, Вазирлар Маҳкамасининг 2021 йил 2 февралдаги « ‘Термиз халқаро савдо маркази’ эркин савдо зонаси фаолиятини ташкил этиш чора-тадбирлари тўғрисида»ги қарори асосида Сурхондарё вилоятининг Ўзбекистон—Афғонистон давлат чегарасига туташ Термиз тумани, «Айритом» маҳалласи ҳудудида «Термиз халқаро савдо маркази» эркин савдо зонасини барпо этиш учун 26 гектар ер майдони ажратилган.
Вазирлар Маҳкамаси тендер ўтказган ва унда ғолиб деб топилган компания қурилиш ишларига тайёргарлик кўрмоқда.
Мазкур ҳолат вилоят ҳокимлиги томонидан назоратга олиниб, Экология ва атроф-муҳитни муҳофаза қилиш қўмитаси вилоят бошқармаси мутахассислари томонидан ўтказилган ўрганиш давомида дарахтлар ноқонуний кесилгани аниқланган.
«Ҳозирда айбдор шахсларга нисбатан жазо муқаррарлигини таъминлаш мақсадида қонунда белгиланган тартибда ҳужжатлар расмийлаштирилиб, тегишли судловликка юбориш чоралари кўрилмоқда», — дейилади ҳокимлик хабарида.
Эслатиб ўтамиз, Шавкат Мирзиёевнинг 3 февралдаги фармони билан Ўзбекистонда дарахт ва буталарни кесишга ўрнатилган мораторий муддати 2021 йил охиригача узайтирилган. Шунингдек, дарахтларни ноқонуний кесганлик учун жарима миқдори икки бараварга оширилган.
Изоҳ (0)