Чехия соғлиқни сақлаш вазири Петр Аренбергер ўз лавозимини тарк этади ва мамлакатда пандемия бошидан буён вазирлик бошқарувини тарк этган тўртинчи амалдорга айланади. Бу ҳақда Associated Press хабар берди.
Таъкидланишича, 7 апрелдан вазир лавозимини эгаллаган Аренбергер Брюсселдаги (Бельгия пойтахти) Евроиттифоқ саммитида иштирок этаётган Чехия бош вазири Андрей Бабишга қўнғироқ қилиб, истеъфога чиқишини айтди. Солиқ ҳисоботида қайд этилган қонунбузарликлар бўйича вазирга қўйилган айблов унинг истеъфосига сабаб бўлгани айтилмоқда.
«Жамият саломатлиги учун ишлаш жараёнида менинг оилам, дўстларим, ҳамкасбларим тобора кўпайиб бораётган нохуш босимга дучор бўлмаслиги керак, деб ўйлайман», — деди Аренбергер.
Ўз навбатида Бабишнинг таъкидлашича, Аренбергер истеъфосига айнан унга ва унинг оиласига бўлган босим сабаб бўлган.
Бабиш соғлиқни сақлаш вазири лавозимига Адам Войтехнинг номзодини кўрсатишни режалаштираётганини қўшимча қилди. Войтех Чехияда коронавирус пандемияси бошланган вақтда айнан шу лавозимда фаолият юритаётган эди. 2020 йилнинг 21 сентябрь куни Войтехнинг ўрнига лавозимни эгаллаган Роман Примула коронавируснинг тарқалишини чеклаш бўйича карантин чоралари доирасида ёпилиши белгиланган ресторанга ташрифи пайтида суратга тушганидан кейин истеъфога чиқишга мажбур бўлган.
Кейинроқ 29 октябрда вазирлик лавозимини Ян Блатни эгаллади. Лекин у эпидемияга қарши кўрилган чоралар, шу жумладан, коронавирусга қарши Россиянинг «Спутник V» вакцинасини сотиб олишдан бош тортгани сабабли ўз лавозимидан озод этилди ва вазирлик бошқаруви Аренбергерга топширилди.
Associated Press маълумотларига кўра, Чехияда касалланиш даражаси пасаймоқда. 24 май куни мамлакатда коронавирус билан касалланиш бўйича 695 та янги ҳолат рўйхатга олинди, март ойининг бошида бу кўрсаткич 17 мингга етган эди. Пандемия бошидан буён Чехияда 1,7 миллионга яқин одам коронавирус билан касалланди, уларнинг 30 мингдан ортиғи вирус қурбонига айланди.
Изоҳ (0)