Босқинчилик жиноятида айбланаётган тўрт нафар шахс Фарғона вилоятининг Тошлоқ туман суди биносидан қочиб кетгани ҳақида хабар берилганди. Ушбу ҳолат юзасидан Тошлоқ тумани ИИБ мансабдорларига нисбатан жиноят иши қўзғатилди, дея маълум қилмоқда «Xabar.uz».
Қайд этилишича, дастлабки терговдаёқ қамоққа олиш эҳтиёт чораси қўлланган судланувчилар ўша куниёқ қўлга олинган.
Бош прокуратура матбуот хизмати маълум қилишича, суддан қочиб кетган айбланувчиларга нисбатан Жиноят кодексининг 222-моддаси 2-қисми «в» банди (қамоқдан ёки қўриқлов остидаги сақлаш жойидан қочиш) билан жиноят иши қўзғатилган.
Шунингдек, Тошлоқ тумани ИИБ мансабдор шахсларига нисбатан ҳам Жиноят кодексининг 207-моддаси 1-қисми (мансабга совуққонлик билан қараш) билан иш қўзғатилиб, дастлабки тергов ҳаракатлари Фарғона вилоят прокуратураси томонидан олиб борилмоқда.
Бундан аввал Тошкент вилояти Жисмоний тарбия ва спорт бошқармаси собиқ раҳбари қамоққа олингани, Тошкент шаҳар ҳокими ўринбосари маҳалла раисини ҳақоратлаб, куч ишлатгани ҳамда Фарғонада 200 доллар пора билан қўлга тушган боғча мудирасига жазо тайинлангани ҳақида хабар берилганди.
Изоҳ (0)