Олий Мажлис Қонунчилик палатаси Меҳнат ва ижтимоий масалалар қўмитасининг кенгайтирилган йиғилиши 26 май куни бўлиб ўтди. Унда Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлигининг «Ўзбекистонлик меҳнат муҳожирларининг ҳуқуқий мақоми ва ижтимоий ҳимоясини таъминлаш чора-тадбирлари»нинг ижроси юзасидан ахбороти эшитилди.
Маълумотларга кўра, 1,7 миллион ўзбекистонлик чет элда, асосан, Россия ва Қозоғистонда меҳнат қилмоқда. Мамлакат аҳолисининг 55 фоиздан ортиғи ёшлардан иборатлиги ҳамда йилига меҳнат бозорига 600 мингга яқин ишчи кучи кириб келаётгани маълум қилинди.
Йиғилишда таъкидланишича, Ўзбекистон ЕОИИга аъзо давлатлар ичида меҳнат ресурслари бўйича Россиядан кейинги ўринда туради. Россияда меҳнат фаолиятини амалга ошираётган хорижий фуқаролар сони бўйича эса Ўзбекистон биринчи ўринда туради.
Қайд этилишича, 2021 йил 30 апрель куни Ўзбекистон ҳукумати билан Евросиё иқтисодий комиссияси ўртасида ҳамкорлик меморандуми ҳамда чора-тадбирлар режаси имзоланган. Мазкур ҳужжатлар меҳнат қилувчиларнинг ижтимоий ва меҳнат ҳуқуқларини ҳимоя қилиш соҳаларида ўзаро манфаатли ҳамкорлигини кўзда тутади.
Таъкидланишича, меҳнат мигрантларини ҳуқуқий, моддий ва ижтимоий қўллаб-қувватлаш билан боғлиқ муаммолар кўп учрамоқда. Мисол учун, иш берувчининг шартнома шартларини бажармаслик, иш ҳақини кечиктириш ёки тўламаслик, меҳнат ва миграция талабларига риоя қилмаслик, солиқдан қочиш учун мигрантларни норасмий ишлатиш ҳолатлари шулар жумласидандир.
Шунингдек, ўзбекистонлик меҳнат муҳожирларининг ҳуқуқий ҳолатига тегишли ва уларнинг ижтимоий ҳимояси билан боғлиқ бўлган тиббий хизмат кўрсатиш, пенсия ва вақтинча меҳнатга лаёқатсизлик даврларини белгилаш ва молиялаштириш, мигрантларнинг оила аъзоларини ҳимоя қилиш, маъмурий ва жиноий тартибда таъқиб қилиш билан боғлиқ муаммоларнинг ҳуқуқий асоси белгиланмаган.
Депутатлар ва иштирокчилар томонидан айнан шу каби муаммоларнинг қонуний ечимига қаратилган, меҳнат мигрантларини қўллаб-қувватлаш тизимини янада такомиллаштириш бўйича бир қатор таклифлар ўртага ташланди. Хусусан, Ўзбекистоннинг меҳнат мигрантлари ҳуқуқлари ва қонуний манфаатларини ҳимоя қилиш бўйича бир қатор халқаро шартномаларга қўшилиш таклифи илгари сурилди.
Бундан ташқари, меҳнат мигрантлари ҳуқуқлари ва қонуний манфаатларини таъминлаш мақсадида «Ташқи меҳнат миграцияси тўғрисида»ги қонунни қабул қилишни тезлаштириш масаласи айтиб ўтилди.
Бундан аввал Қозоғистондаги Ўзбекистон фуқароларидан 5 июнга қадар мамлакатда қолишни қонунийлаштириш талаб этилгани, Россияда баъзи муҳожирлар учун махсус ҳуқуқий режим жорий қилингани ҳамда Uzbekistan Airways меҳнат муҳожирларига чегирмаларни бекор қилгани ҳақида хабар берилганди.
Изоҳ (0)