Eriell Group Ўзбекистон Республикаси Энергетика вазирлиги томонидан Ўзбекистон энергетика, нефть-газ ва геология соҳалари ходимлари касаба уюшмаси республика кенгаши ҳамкорлигида, иқтидорли ва ижтимоий фаол ёшларни аниқлаш мақсадида ташкил этилган ёқилғи-энергетика комплекси (ЁЭК)нинг биринчи халқаро ёшлар форумида иштирок этди.
Форумда Eriell Group’нинг ёш мутахассислари иттифоқи вакиллари ва ходимлари иштирок этиб, улар компаниялар гуруҳи фаолиятига доир маърузалар билан чиқиш қилди. Бурғилаш соҳасидаги юқори технологик хизматларни кўрсатишга замонавий ёндашувлар хусусида сўзлаб берилди, улар юртимизда энг мураккаб лойиҳаларни амалга ошириш бўйича тажрибалари билан ўртоқлашишди.
Форумда Eriell Group стенди тақдимоти бўлиб ўтди. Унда иштирокчилар ўзаро тажриба ва ғоялар алмашишди, қизиқтирган саволларига жавоб олишди. Мулоқот чоғида ёш мутахассислар ва талабалар ЁЭК соҳасининг бўлажак мутахассислари ва бу соҳада фаолият юритаётган ёшлар ўртасида яқин алоқалар ўрнатишга қаратилган қатор таклиф ва ташаббусларни илгари сурди.
«Форум иштирокчиларга етакчи компаниялар фаолияти, ЁЭК ишлаб чиқариш фаолиятининг тўлиқ тузилмаси, турли саноат тармоқлари технологик жараёнларидаги ютуқлар ва инновациялар билан танишиш имкониятини тақдим этди. Унда ёш мутахассислар иштирок этгани тармоқлараро ҳамкорлик тўғрисида умумий тушунчага эга бўлиш ва унинг муҳимлигини англаб етишга замин яратди. Тренинглар, жамоавий ўйинлар ва кўнгилочар тадбирлар ҳам кўтаринки кайфиятда ўтганини алоҳида таъкидлаб ўтмоқчиман. Бу тармоқларнинг бўлажак раҳбарларига жамоа билан ишлаш ва ўзаро шерикликнинг муҳим жиҳатларини англаб етишга имкон яратади. Форум ёш мутахассисларга етакчилик қобилиятини синовдан ўтказиш, шериклар олдида ўз компаниясини тақдим этиш ва нотиқлик санъатининг нақадар муҳим эканини англаб етиш имкониятини тақдим этди. Ишончим комилки, форум мазкур соҳадаги ёшларнинг келгусидаги фаолиятига ижобий таъсир кўрсатади. Шу ўринда ташкилотчилар, устоз ва мураббийларга миннатдорчилик билдирмоқчиман!», – дейди Eriell Group лойиҳаси раҳбари Э. Дўстмуҳамедов.
«Бундай кенг кўламли форумда илк бор иштирок этмоқдамиз. Бошқа компанияларнинг ёш мутахассислари билан учрашиш ва мулоқот қилиш жуда қизиқарли бўлди. Барчамиз тажриба орттирдик, ёрқин таассуротларга эга бўлдик. Бу нафақат профессионал жиҳатдан фойдали, балки кўтаринки кайфият ҳам бахш этади. Ишонч билан айтишим мумкинки, кейинги форумда ҳам бажонидил иштирок этаман», – дея ўз таассуротлари билан ўртоқлашди Eriell Group’нинг бурғилаш қоришмалари бўйича ёш муҳандиси Р.Маннонов.
«Форум юксак савияда ўтди. Зерикишга вақт бўлмади, у 5 кун давомида кетма-кет ўтказилган турли тренинглар, танловлар, мусобақаларга бой бўлди. Янги дўстлар орттирдик, эски алоқаларни мустаҳкамладик. Устоз-мураббийлар ўгитидан баҳраманд бўлдик, энергетика тармоғининг ёш вакиллари билан ўз тажрибамизни бўлишдик. Кейинги форумни интизорлик билан кутиб қоламиз!», – деди Eriell Group қия йўналтирилган қудуқларни лойиҳалаш бўйича мутахассиси А. Йўлдошев.
Eriell Group Ўзбекистоннинг қазиб олиш саноатида муваффақиятли фаолият юритиб келаётган, йирик мустақил сервис компаниялар гуруҳларидан бири ҳисобланади. Нефть сервисининг замонавий технологияларидан фойдаланиш, ходимларнинг юксак профессионализм даражаси гуруҳнинг тармоқдаги энг етакчи компаниялардан бири мақомини ушлаб туришини таъминламоқда.
Форумда жами 500 дан ортиқ киши, жумладан ЁЭК соҳаси ўқув муассасаларида таҳсил олаётган талабалар иштирок этди. Иштирокчилар ёшларда ягона корпоратив маданиятни шакллаштириш, профессионал, техник, корпоратив ва бошқарув кўникмаларини ривожлантириш, шунингдек, ёш мутахассисларни инновацион, тадқиқот ва лойиҳа фаолиятига жалб қилиш масалаларини муҳокама қилишди.
Eriell Group матбуот хизмати
Изоҳ (0)