Ўзбекистоннинг Олмаотадаги Бош консулхонаси мамлакат фуқароларига 2021 йил 5 июнь куни Қозоғистон ҳудудида чет элликларнинг вақтинчалик бўлиш муддати тугашини эслатди, деб хабар беради «Дунё» агентлиги.
«Қозоғистон ваколатли органларига кўра, 2021 йил 5 июнь куни республика ҳудудида чет элликларнинг вақтинчалик қолиш муддати тугайди. COVID-19 пандемияси муносабати билан хорижликларни мамлакатдан чиқиб кетишига имконият бўлмагани боис вақтинча бўлиб туриш муддатлари бир неча марта узайтирилган эди. Шу муносабат билан чет элликлар ва уларни таклиф қилган шахсларни маъмурий жавобгарликка тортишнинг олдини олиш мақсадида белгиланган муддатгача Қозоғистон ҳудудида қолишни қонунийлаштириш сўралади», — дейилади Бош консулхона хабарида.
Қозоғистон ҳукумати хабарида айни пайтда давлат чегарасидаги ер ва ҳаво қатновлари одатий тарзда фаолият юритаётгани қайд этилган. Россия, Беларусь, Қирғизистон, Ўзбекистон, Тожикистон, Жанубий Корея, Украина, Туркия, Миср, Германия, Бирлашган Араб Амирликлари, Нидерландия, Грузия, Черногория ва Шри-Ланка каби 15 давлат билан мунтазам қатновлар йўлга қўйилган.
Таъкидланишича, Қозоғистон чегара хизмати чет эллик фуқароларнинг мамлакатдан тўсиқсиз қайтиши учун барча чора-тадбирларни амалга оширади.
Юқоридагиларни ҳисобга олган ҳолда, Бош консулхона Ўзбекистон фуқароларидан Қозоғистон ҳудудида вақтинча бўлиб туриш муддати тугаган бўлса, ўзларининг яшаш жойидаги ички ишлар органларида мамлакатда қолиш ҳолатини қонунийлаштириш ёки 2021 йил 5 июндан олдин мамлакат ҳудудини тарк этишини тавсия қилади.
Аввалроқ Шавкат Мирзиёевнинг 25 февралдаги қарори билан Ўзбекистон ва Қозоғистон ҳукуматлари ўртасида меҳнат фаолияти ва Қозоғистонда Ўзбекистон фуқароси бўлган меҳнат муҳожирлари ва Ўзбекистонда Қозоғистон фуқароси бўлган меҳнат муҳожирлари ҳуқуқларини ҳимоя қилиш тўғрисидаги битим тасдиқлангани ҳақида хабар берилган эди.
Изоҳ (0)