Ижтимоий тармоқларда Самарқанд вилояти Оқдарё туманидаги 63-сонли ихтисослашган мактаб-интернатдаги юз-кўзлари кўкарган болалар акс этган суратлар муҳокамага сабаб бўлмоқда. Ҳолат юзасидан Сенат ахборот хизмати маълумот берди.
Қайд этилишича, мазкур ҳолат Сенатнинг Фан, таълим ва соғлиқни сақлаш масалалари қўмитаси томонидан назоратга олинган. Тегишли идораларга ушбу масала қонуний кўриб чиқилиши юзасидан кўрсатмалар берилган.
Самарқанд вилояти ҳокимлигининг таъкидлашича, ҳолат юзасидан ишчи гуруҳ тузилиб, ўрганиш ишлари олиб борилмоқда.
Фаолияти давомида масъулиятсизликка йўл қўйган масъуллар билан тузилган меҳнат шартномалари бекор қилиниб, амалдаги қонунчиликка мувофиқ суриштирув ишлари давом этмоқда, дейилади ҳокимлик хабарида.
Мактаб-интернатда содир бўлган мазкур ҳолат юзасидан ўрганиш натижаларига асосан батафсил маълумот берилиши маълум қилинган.
Бундан аввал Қашқадарёда беморни ҳақоратлаган шифокор ўз хоҳишига кўра ишдан бўшагани, Навоийда ўқувчи қизнинг онаси фарзандидан мактабга формада келишини сўраган ўқитувчини калтаклагани ҳамда Тошкентда 92 ёшли аёл қизи ва невараси томонидан калтаклангани ҳақида хабар берилганди.
Изоҳ (0)