Урганч тумани СЭО томонидан ўтказилган тендерда раҳбарнинг укасига тегишли корхона ғолиб чиққани аниқланди. Бу ҳақда Монополияга қарши курашиш қўмитаси хабар берди.
Маълум қилинишича, Санитария-эпидемиологик осойишталик ва жамоат саломатлиги хизматининг Хоразм вилояти бошқармаси Урганч туман бўлими бошлиғи лавозимига Икром Отаниёзов 2020 йилнинг ноябрида тайинланган.
Бўлим биноси ва ҳожатхонасини жорий таъмирлаш учун 2021 йил 26 мартда эълон берилиб, 7 апрелда тендер ўтказилган. Комиссия қиймати 225,5 миллион сўм бўлган бинони жорий таъмирлаш учун «ЖК» МЧЖни ғолиб деб топган.
Ўрганиш давомида мазкур корхона устав фондидаги улушлари, юридик шахслар реестрига кўра, тўлиғича бўлим бошлиғи Икром Отаниёзовнинг укасига тегишли эканлиги аниқланган.
Президентнинг 2020 йил 6 июлдаги «Рақобат муҳитини янада ривожлантириш ва иқтисодиётдаги давлат иштирокини қисқартириш бўйича қўшимча чора-тадбирлар тўғрисида»ги фармонига мувофиқ ошкораликни таъминлаш ва давлат хариди тартиб-таомилларини янада такомиллаштириш мақсадида, 2020 йил 1 октябрдан бошлаб ушбу фармонга асосан, давлат буюртмачиси, стратегик аҳамиятга эга бўлган хўжалик жамияти ва корхонаси билан манфаатлар тўқнашувига эга бўлган хўжалик юритувчи субъект давлат харидларини ёки энг яхши таклифларни танлаб олишнинг ёхуд тўғридан-тўғри музокаралар иштирокчиси бўлиши мумкин эмас.
Шунингдек, «Давлат харидлари тўғрисида»ги қонуннинг 40-моддасида давлат харидлари жараёнида манфаатлар тўқнашувига йўл қўйилмаслиги белгиланган.
Юқоридагиларга асосан, Санитария-эпидемиологик осойишталик ва жамоат саломатлиги хизматининг Хоразм вилояти бошқармаси Урганч туман бўлимига нисбатан белгиланган тартибда иш қўзғатилиб, ишни кўриб чиқиш натижаларига кўра, тендер савдоси бекор қилинган.
«Маъмурий жавобгарлик тўғрисида»ги кодекснинг 178-моддаси (рақобат тўғрисидаги қонун ҳужжатларини, табиий монополиялар тўғрисидаги қонун ҳужжатларини ва истеъмолчиларнинг ҳуқуқларини ҳимоя қилиш тўғрисидаги қонун ҳужжатларини бузиш) 6-қисмига мувофиқ расмийлаштирилган маъмурий иш ҳужжатлари тегишли суд органига юборилган.
Мавзуга доир:
- Андижонда давлат буюртмаларини буюртмачининг ўзига тегишли компаниялар тақсимлаб олгани маълум бўлди
- Жиззах вилояти ҳокимининг қизига тегишли компания кўчаларга гул экиш бўйича 1,9 млрд сўмлик яна бир тендерни ютиб олгани маълум бўлди
- «Жиззахча тендерлар-2». Бир неча юз млрд сўмлик лойиҳаларни вилоят ҳокими ўринбосарининг қариндошлари қўлга киритгани маълум бўлди
- «Навоийча тендер». Бир неча млрд сўмлик давлат буюртмаларини тендер буюртмачиси раҳбари оиласига тегишли корхона қўлга киритгани маълум бўлди
Изоҳ (0)