Андижон шаҳар Чўлпон шоҳ кўчасида жойлашган «Ўзбегим» савдо мажмуасида ёнғин юз берди, деб хабар бермоқда ФВВ матбуот хизмати.
Мажмуанинг том қисмида ёнғин содир бўлаётгани тўғрисида вилоят Фавқулодда вазиятлар бошқармасига хабар 25 май куни соат 12:00 да келиб тушган.
Андижон вилояти ФВБ ёнғин-қутқарувчилари соат 12:02 да воқеа жойига етиб борган ва соат 12:45 да ёнғин тўлиқ ўчирилган. Ёнғин натижасида бино том ва шифт қисмининг 30 квадрат метр майдони зарарланган.
Таъкидланишича, ФВВ ёнғин-қутқарувчилари томонидан мажмуа биносида бўлган барча фуқаролар ўз вақтида тезкорлик билан эвакуация қилинганлиги сабаб жабрланган ва ҳалок бўлганлар йўқ.
Воқеа жойига вилоят ФВБ ҳамда тегишли ташкилотлар раҳбарияти етиб борган. Вазият оқибатларини бартараф этишга 9 та ёнғин-қутқарув экипажи ва 1 та автонарвон жалб этилган.
Ҳозирда ёнғин сабаби ва моддий зарар миқдори аниқланмоқда.
Аввалроқ Хоразмдаги деҳқон бозорида ёнғин содир бўлгани, Самарқанд вилоятининг Ургут туманидаги деҳқон бозорида ёнғин юз бергани ҳақида хабар берилган эди.
Изоҳ (0)