«Обод қишлоқ» ва «Обод маҳалла» доирасидаги ишлар сифатсиз олиб борилаётгани ҳақида Бош прокуратурага мурожаат қилиш бўйича янги тизим ишга туширилди

Бош прокуратура «Обод қишлоқ» ва «Обод маҳалла» дастурлари ижроси юзасидан жамоатчилик назоратини йўлга қўйиш мақсадида махсус Telegram-бот дастурини ишга туширди. Бу ҳақда идора матбуот хизмати хабар берди.

«Агар сиз яшаётган ҳудудда ‘Обод қишлоқ’ ва ‘Обод маҳалла’ дастурлари доирасида қурилаётган бино-иншоотларда камчиликларни пайқасангиз, қурилиш ишларининг сифатсиз олиб борилаётгани ёки тўхтаб қолганининг гувоҳи бўлсангиз, асл ҳолатни суратга олинг ва махсус Telegram-ботга жойлаштиринг», — дейилади хабарда.

Бунинг учун мавжуд камчиликни суратга олиш ва Telegram-ботга (@obod_mahalla_dasturi_bot) кириб, объект жойлашган ҳудудни белгилаб, «юбориш» тугмасини босиш лозим. Электрон дастур ишчи гуруҳни автоматик тарзда қизил белги билан келиб тушган мурожаат ҳақида хабардор қилади.

Қайд этилишича, мурожаат тушгандан сўнг ишчи гуруҳ томонидан мавжуд салбий ҳолатни бартараф этиш чоралари кўрилади. Бунда барча фуқаролар қурилиш ишлари билан танишиб, камчиликлар тўғрисида ўз мурожаатини юбориш имконига эга.

Эслатиб ўтамиз, 2021 йилда Президентининг «‘Обод қишлоқ’ ва ‘Обод маҳалла’ дастурларини амалга ошириш бўйича қўшимча чора-тадбирлар тўғрисида»ги қарорига кўра, Ўзбекистонда 8 мингга яқин қишлоқ ва маҳаллада қурилиш-таъмирлаш ишлари амалга оширилади.