Қайд этилишича, 2021 йил 24 май куни соат 09:30 ларда Ангрен шаҳридан ўтувчи А-373 автомобиль йўлининг 184-километрида Наманган–Тошкент йўналиши бўйича ҳаракатланаётган MAN русумли тиркамали юк автомобили бошқарувини йўқотиб, ағдарилиб кетган ва темир йўл кесишмасига етмай тўхтаган.
Оқибатда юк машинаси 3 та Lacetti, 2 та Nexia-3, Cobalt ва Matiz русумли автомобиллар билан тўқнашиб, ЙТҲ содир бўлган. Тўқнашувдан сўнг Lacetti русумли автомобиллардан бири ёнган.
ЙТҲ оқибатида 5 нафар фуқаро воқеа жойида вафот этган, 4 нафар фуқаро турли даражада тан жароҳати олган. Фуқароларнинг шахсига аниқлик киритилмоқда.
Тан жароҳати олган фуқаролар Ангрен шаҳар тиббиёт бирлашмасига ётқизилган.
Воқеа жойига Тошкент вилояти Фавқулодда вазиятлар бошқармаси ва Ангрен шаҳар Фавқулодда вазиятлар бўлими, ИИБ, прокуратура ва ССБ ҳамда тезкор тергов гуруҳи ходимлари чиқишган.
Содир бўлган ЙТҲ юзасидан дастлабки терговолди текширув ишлари олиб борилмоқда.
Бундан аввал Жомбойда Cobalt пиёдани уриб юборгани, Тошкентда йўлни ажратиб турувчи тўсиққа урилган Spark ҳайдовчиси шифохонада вафот этгани ҳамда Самарқандда Nexia ва автобус иштирокида содир бўлган ЙТҲ оқибатида енгил машина ҳайдовчиси ҳалок бўлгани ҳақида хабар берилганди.
Изоҳ (0)