Тошкент вилоятида 4 ой давомида 800 та ҳолатда тиғли жисмлар олиб юриш ҳолати аниқланиб, 18 нафар қидирувдаги шахслар ушланди

Тошкент вилоят ППХ ходимлари томонидан 800 та ҳолатда тиғли жисмлар олиб юриш факти аниқланиб, 18 нафар қидирувдаги шахслар ушланди, дея хабар бермоқда вилоят ИИББ.

Қайд этилишича, ўтган 4 ой мобайнида 800 нафардан ортиқ иш ва яшаш жойи ноаниқ бўлган шахслар реабилитация марказларига жойлаштирилди.

Тошкент вилояти ИИББ Патруль-пост хизмати ва жамоат тартибини сақлаш бошқармаси ходимлари томонидан вилоят ҳудудида жиноятчиликнинг олдини олиш, жамоат ва фуқаролар хавфсизлигини таъминлаш бўйича бир қатор чоралар кўрилмоқда.

Жумладан, 2021 йилнинг ўтган 4 ойи мобайнида Патруль-пост хизмати ходимлари иштирокида кўплаб жиноятлар фош этилган бўлса, 18 нафар қидирувда бўлган шахслар аниқланиб, ушланди.

Шунингдек, бедарак йўқолган 7 нафар шахс оиласига қайтарилган бўлса, иш ва яшаш жойи ноаниқ бўлган 838 нафар шахслар реабилитация марказларига жойлаштирилди.

Жиноятнинг асосий воситаларидан бири бўлган қуролланиш, яъни ўткир тиғли жисмлар ва бошқа ноқонуний қуролларни олиб юриш, сақлаш бўйича ўтказилган «Тиғ» махсус-профилактик тадбири давомида, 811 нафардан ортиқ фуқаролардан 792 та ўткир тиғли жисмлар тегишли тартибда олиниб содир этилиши мумкин бўлган кўнгилсиз ҳолатларнинг олди олинди.

Уларнинг, 675 таси пичоқ, 9 таси кастет, 8 та бита ва 100 та бошқа кўринишдаги ўткир тиғли жисмларни ташкил қилади.

Бундан аввал Бухорода тадбиркорнинг ўзи ва оиласига қуролли босқинчилик уюштирмоқчи бўлганлар қўлга олингани, Фарғонада хонадонга бостириб кириб, уй эгаларига тан жароҳати етказган ниқобли босқинчилар ушлангани ҳамда Тошкент вилоятида ўтказилган «Тиғ» тадбири давомида пичоқ кўтариб юрган 400 дан ортиқ шахс аниқлангани ҳақида хабар берилганди.