Toshkent viloyatida o‘tkazilgan “Tig‘” tadbiri davomida pichoq ko‘tarib yurgan 400 dan ortiq shaxs aniqlandi

Toshkent viloyati IIBB va uning quyi tizim xodimlari tomonidan o‘tkazilgan “Tig‘” maxsus profilaktik tadbirlari davomida o‘tkir tig‘li jismlarni noqonuniy olib yurgan 480 nafar fuqaro aniqlandi. Bu haqda viloyat IIBB axborot xizmati xabar berdi.

Ta’kidlanishicha, profilaktik tadbir davomida fuqarolar yonidan jami 478 dona o‘tkir tig‘li ashyolar (sovuq qurol) tegishli tartibda olingan. Jismlarning 406 tasi pichoq, 9 tasi kastet, 6 tasi “bita” bo‘lsa, qolgan 57 tasi boshqa ko‘rinishdagi o‘tkir tig‘li jismlar hisoblanadi.

Ma’lumot uchun, “sovuq qurolni yoki sovuq qurol sifatida foydalanilishi mumkin bo‘lgan ashyolarni olib yurish” BHMning 1 baravaridan 5 baravarigacha (245 mingdan 1,225 million so‘mgacha) miqdorda jarima solishga, shuningdek, “O‘zbekiston Respublikasi hududida fuqaroviy va xizmat quroli sifatida muomalada bo‘lishi taqiqlangan ashyolarning qonunga xilof ravishda muomalada bo‘lishi” BHMning 5 baravaridan 10 baravarigacha miqdorda jarima solishga yoki 15 sutkagacha ma’muriy qamoqqa olishga sabab bo‘ladi.

Eslatib o‘tamiz, O‘zbekistonda 2020-yilning dastlabki sakkiz oyida o‘tkir tig‘li predmetlardan foydalangan holda 542 ta jinoyat sodir etilgan, shundan 168 tasi qotillik.