Тошкент шаҳар Бектемир туманида А.П. исмли фуқаро ИИБга мурожаат қилиб, iPhone Х смартфонини харид қилган шахс унга қалбаки валюта бериб кетганини билдирган ва бу борада ёрдам сўраган. Бу ҳақда пойтахт ИИББ ахборот хизмати хабар берди.
Аёл ўзининг телефонини «Olx» мобил дастури орқали сотувга қўйган ва қурилмани номаълум шахсга 500 АҚШ долларига сотган. Кейинчалик пуллар қалбаки бўлиб чиққан.
Олиб борилган суриштирув ишлари давомида бу каби ҳолатлар Тошкент шаҳарнинг бир неча туманларида ҳам содир этилгани маълум бўлган. Хусусан, Шерзод исмли фуқаро ҳам Чилонзор тумани ИИБга шу каби муаммо юзасидан мурожаат қилган: эркак iPhone 11 Pro’сини 700 долларга сотган, бироқ пуллар қалбаки бўлиб чиққан.
Маълум қилинишича, Тошкент шаҳар ИИББ ва туман бошқармаларига қалбаки валюталар билан савдо қилинганига оид ўнлаб мурожаатлар келиб тушган. Ҳолат юзасидан фуқаролар чақиртирилиб суриштирув ишлари олиб борилганида, улар муайян ҳақ эвазига ўзининг номига SIM-карта олиб бергани аниқланган.
Кузатув камераларида доим бош кийим ва ниқобда кўриниш берган шахс охир-оқибат ИИБ ходимлари томонидан ушланган. Аниқланишича, у Сергели туманида яшовчи Ф. исмли фуқаро бўлиб, 1991 йилда туғилган ва муқаддам судланган.
«Гумонланувчи телефонларни Қозоғистонга олиб кетувчи шериги Т.нинг иштироки ҳеч бир кузатув камераларида акс этмаган ва жабрланувчилар ҳам пулни Ф.дан олган», — дейилади хабарда.
Ҳозирда жабрланувчиларга тегишли ўнлаб мобил қурилмалари блокланган, аммо гумонланувчининг сўзларига кўра, у ўтган бир йил ичида яна кўплаб телефонларни қалбаки валюталарга сотиб олган.
Аввалроқ Сирдарёдаги банкда 81 минг евро қалбаки валюта аниқлангани, Учтепада қалбаки 6350 долларни муомалага киритмоқчи бўлган шахс аниқлангани ҳамда Андижонда қалбаки долларлар эвазига 9 та iPhone 12 сотиб олишга, Наманганда эса қалбаки пулларни банкка ўтказишга уринган шахслар ушлангани ҳақида хабар берилганди.
Изоҳ (0)