Ўзбекистон бош прокурорининг 21 май кунги буйруғи билан Андижон шаҳар прокурори лавозимида ишлаб келаётган адлия маслаҳатчиси Қурбонали Асқаров ўз хоҳишига кўра берган аризасига асосан лавозимидан озод этилди. Бу ҳақда Бош прокуратура матбуот хизмати хабар берди.
Маълум қилинишича, Қурбонали Асқаровнинг лавозимидан озод этилиши 17 май куни халқ депутатлари Андижон шаҳар Кенгашининг навбатдан ташқари сессиясида рўй берган ҳолатлар билан боғлиқ эмас.
Эслатиб ўтамиз, халқ депутатлари Андижон шаҳар кенгашининг 17 май куни ўтказилган навбатдаги сессиясида депутатлар тинтувдан ўтказилгани, ушбу сессияда Андижонда ер сотувчиларнинг кирдикорларини фош қилиб юрган депутатни прокурор тақдимномасига кўра дахлсизлик ҳуқуқидан маҳрум қилингани ҳақида хабар берилган эди. Коррупцияга қарши курашиш агентлиги мазкур ҳолатга муносабат билдирган, Сенат эса ҳолат бўйича ўрганиш ишлари олиб борилаётганини маълум қилганди.
Кейинроқ Бош прокуратура дахлсизлик ҳуқуқи бекор қилинган андижонлик депутат нимада айбланаётгани юзасидан баёнот берганди.
Изоҳ (0)