Тошкентда Давлат божхона қўмитаси Контрабандага қарши курашиш ва божхона аудити бош бошқармаси ходимлари томонидан ДХХ билан ҳамкорликда кучли таъсир қилувчи дори воситаларининг ноқонуний савдоси билан шуғулланувчи бир гуруҳ шахсларнинг жиноий фаолиятига чек қўйилди, деб хабар бермоқда қўмита матбуот хизмати.
Маълум қилинишича, дастлаб Тошкентнинг Чилонзор туманида олдиндан кузатувга олинган 2 нафар фуқаро — Ж.С. ҳамда А.К. 300 дона «Тропикамид» номли кучли таъсир қилувчи дори воситасини сотаётганида тўхтатиб қолинган.
Шундан сўнг А.К.нинг вақтинча яшаб келаётган хонадони белгиланган тартибда кўздан кечирилганида, фуқаро И.Ж. томонидан улгуржи сотиш учун қадоқлаб қўйилган 496 дона «Тропикамид» ва 19 дона «Зардекс Габапентин» номли кучли таъсир қилувчи дори воситаси ноқонуний равишда сақланаётганлиги фош қилинган. И.Ж.га тегишли Lacetti кўздан кечирилганида, мазкур автомашина салонида 1 дона қалбаки 100 доллар купюраси борлиги аниқланган.
Тадбир давомида жиноий гуруҳ раҳбари — фуқаро Х.С.нинг жиноий фаолиятига ҳам чек қўйилган. У ҳайдаб кетаётган Captiva тўхтатилиб, белгиланган тартибда кўздан кечирилганида, машина салонида 29 дона «Селофен Залеплон» номли кучли таъсир қилувчи дори воситаси топилган.
Шундан сўнг ушбу шахс яшаб келаётган Чилонзор туманидаги хонадон кўздан кечирилганида, 520 дона «Селофен Залеплон», 219 дона «Регапен Прегабалин» ва 2 дона «Тропикамид» номли кучли таъсир қилувчи дори воситаси борлиги аниқланиб, ашёвий далил сифатида олинган.
Шу билан бирга, фуқаро Х.С.нинг Чилонзор туманида жойлашган дорихонаси ҳам тезкор тадбир иштирокчилари томонидан кўздан кечирилганида, дорихонада сотувчи Ю.О. томонидан 139 дона «Зардекс Габапентин», 337 дона «Карбамазепин» ва 8 дона «Тропикамид» номли кучли таъсир қилувчи дори воситаси сотувга чиқарилгани аниқланган.
Ўтказилган кенг қамровли тезкор тадбирда дастлабки қиймати 200 миллион сўмдан ортиқни ташкил этувчи 5 турдаги 2069 дона кучли таъсир қилувчи дори воситасининг ноқонуний муомаласига чек қўйилган.
Ҳозирда божхона органлари томонидан ушбу ҳолат юзасидан Жиноят кодексининг тегишли моддаси билан жиноят иши қўзғатилиб, тергов органига юборилган.
Аввалроқ Тошкентда қарийб 100 миллион сўмлик кучли таъсир қилувчи дори воситаларининг ноқонуний айланмасига чек қўйилгани, Жиззахда божхоначилар томонидан тўхтатилган Epica’дан гашиш, Самарқандда автомобиль шинаси ичидан опий топилгани, Фарғонада уйида гиёҳванд модда сақлаб келган шахсга нисбатан жиноят иши қўзғатилгани ҳамда Андижонда гиёҳванд моддаларни оёқ кийимга яшириб ўтмоқчи бўлганлар қўлга тушгани ҳақида хабар берилганди.
Изоҳ (0)