Ўзбекистон Президентининг 19 май куни қабул қилган хорижий тилларни ўрганишни оммалаштириш тизимини такомиллаштириш бўйича қарори билан Вазирлар Маҳкамаси ҳузурида Хорижий тилларни ўрганишни оммалаштириш агентлиги ташкил этилди. Шу куни ҳукумат томонидан қабул қилинган қарор билан агентликка директор ўринбосарлари тайинланди.
Қарорга кўра, Азимжон Хусанов ва Санжар Обидов Вазирлар Маҳкамаси ҳузуридаги Хорижий тилларни ўрганишни оммалаштириш агентлиги директорининг ўринбосарлари этиб тайинланди.
Эслатиб ўтамиз, Ўзбекистонда Хорижий тилларни ўрганишни оммалаштириш агентлиги ташкил этилиши ҳақида 6 май куни Шавкат Мирзиёев раислигида ўтказилган йиғилишда маълум қилинганди. «Агентлик, энг аввало, дунёда самарали натижа берган ўқитиш методикалари, дастур ва дарсликларини боғча, мактаб, лицей, олийгоҳ ва ўқув марказларида жорий этиб, хорижий тилларни мукаммал ўзлаштиришга кўмаклашади», — деган эди Президент.
Ушбу йиғилишда давлат раҳбари олийгоҳлардаги 78 фоиз профессор-ўқитувчиларнинг чет тилини билиш даражаси қониқарсиз аҳволда эканини танқид қилиб, таълим муассасалари битирувчилари камида 2 та чет тилини мукаммал билиши шартлигини таъкидлаганди.
Изоҳ (0)