Тошкент шаҳри ва вилоятининг айрим туманларида сув таъминоти назоратчилари томонидан аҳолидан пул ундириш амалиёти тўхтатилади

Тошкент шаҳри ва Тошкент вилоятининг айрим туманларида назоратчилар аҳолидан пул олиши амалиёти тўхтатилади, дея хабар қилмоқда «Ўзсувтаъминот» ахборот хизмати.

Маълум қилинишича, 2021 йил 20 майдан 1 июлгача пилот лойиҳа тариқасида Тошкент шаҳрининг Олмазор ва Шайхонтоҳур туманлари ҳамда Тошкент вилоятининг Қибрай туманида («Мусаффо обиҳаёт» МЧЖ истеъмолчиларидан ташқари) сув таъминоти корхоналарининг назоратчилари томонидан хизматлар учун аҳолидан пул ундириш ишлари бутунлай тўхтатилади.

Ушбу ҳудудларга бириктирилган назоратчилар фақат белгиланган тартибдаги кузатув ва хатлов ишлари билан шуғулланади, улар тасарруфидаги тўлов терминаллари ва термопринтерлар бошқа ҳудудларга бириктирилади.

Ичимлик ва оқова сув хизматлари учун тўловларни ўз вақтида амалга оширишда қуйидаги воситалардан фойдаланиш мумкинлиги эслатиб ўтилади:

• «Cabinet.uzst.uz» шахсий кабинет орқали;
• @uzst_bot Telegram боти орқали;
• электрон тўлов тизимлари ҳамда тўлов инфокиосклари;
• тижорат банклари мобил иловалари;
• тижорат банк кассалари ва шохобчалари ҳамда почта бўлимлари.