Бухоро вилоятида яшовчи бола 2018 йил, 4 ёшида отаси томонидан Россияга олиб кетилгач, орадан уч йил ўтиб онаси бағрига қайтарилди. Бу ҳақда «Дарё»га МИБ вилоят бошқармаси масъул ходими Анвар Салимов маълум қилди.
Таъкидланишича, Ромитан туманида яшовчи фуқаро Л.Н. турмуш ўртоғи Р.О. билан ўзаро келишмовчилик сабаб доимий жанжаллашиб келган. Шунга қарамасдан аёл 2018 йил 4 ёшли фарзанди М.А.ни эри билан бирга бир йил муддатга Россияга боришига розилик берган. Бироқ орадан икки йил вақт ўтса-да, ота фарзандини хотинига қайтармаган.
Шундан сўнг аёл Фуқаролик ишлари бўйича Ромитан туманлараро судига мурожаат қилган. Суд эса беш ёшга тўлган М.А.ни онаси тарбиясига мажбурий тартибда олиб бериш тўғрисида қарор чиқарган. Бюро ишга киришган.
Ижро ҳаракатлари давомида ота фарзандини онаси тарбиясига қайтариши лозимлиги ҳақидаги огоҳлантиришларга ҳам эътибор бермай, қонуний талабларга бўйсунмаган.
2021 йилда 7 ёшли М.А.нинг 67 ёшли бувиси Ч.К. Ўзбекистонга қайтиш учун чипта харид қилиш мақсадида Россия аэропортларидан бирига борган. Бу жараёнда божхона хизмати томонидан М.А.нинг қидирувда экани ойдинлашган ва бола Ўзбекистонга қайтарилган. Бола онаси бағрига соғ-саломат қайтган.
Изоҳ (0)