Раққоса Паризода «Ўзим» лойиҳасига берган интервьюсида профессионал рақсда уни ҳанузгача қабул қилишмагани, устозларидан жуда кўп танқидлар эшитишини сўзлаб берди.
«Рақс санъатига кирганимдан бошлаб бувижоним айтардиларки, зўр раққоса бўлгин, Ўзбекистонда хизмат кўрсатган унвонини олгин, деб турмуш қурганимча шу нарсага ҳаракат қилдилар. Шу унвонни олволгин, турмуш қурган жойингга ҳам чиройли борасан. Ҳа, анави раққоса келди, дейишмайди. Давлат одами, ҳурматли Паризодахон келди, дейишади. Чиройли кутиб олишади турмуш қурган жойингда ҳам, дегандилар. Жуда ҳам хоҳлагандилар шу унвонни олишимни. Вақтлар ўтяпти, мен жуда кўп ҳаракат қилдим, бўлмади. Рақс оламида қадрим бўлмагани учун бу соҳадан секин чиқиб кетишга ҳаракат қилдим. Тўғри, рақсимни, ижодимни давом эттираман. Ўзимнинг орзуларим бор, ўша орзуларим ушалмагунча ўқиётган китобимни ёпиб қўя олмайман, деган фикр бор менда. Аксарият устозларимиз мени кўп камситиб, хафа қилиб, жуда кўп дилимни оғритишган. Шунинг учун рақс оламидан чиқишга ҳаракат қилдим. Борсам ҳам, тез чиқиб кетишга ҳаракат қиламан», — дейди раққоса.
«Хореография билим юртида шундай кирсангиз, сиз ҳақингизда гапиришади. Бу рақс санъатини бузяпти, бу меросий рақсларни бузяпти, деб баланд овозда гапиришади. Кирган жойимда йиғлаб чиқиб кетардим. Ҳар имтиҳонда шу мавзу. Мен рақс ҳақида гапирсам, фақат кўзимга ёш келади, чунки қадрим бўлмади. Бошқа ҳеч қанақасига кўзимга ёш келтира олмайсиз. Ҳаётда ҳар бир нарса синов деб биламан. Буёқда бўлмаган бўлса, халқимизнинг меҳр-муҳаббатига эришдим. Буям ҳаётда ҳеч нарса тўла-тўкис бўлмайди, деган нарсани юзага келтиради. Паризода, мана шу ҳаракатинг нотўғри, мана бунақа қилсанг, мана бунақа чиқади, кел, шунақа қилайлик, деган бирор устоз чиқмади. Менинг ичим қайнаб турибди, нимадирлар қиламан: ансамбл очганман, у устозни олиб келаман, рақс қўйдираман, бу устозни олиб келиб, мана бунақа қиламан, дердим. Нимага ансамбл очдим? ‘Халқлар дўстлиги’да шоулар қиламан, деб ўйлардим. Лекин ҳадеб ёмонлайвериб, бундай ўйнасанг ҳам бўлмайди, ундай ўйнасанг ҳам бўлмайди, деган ёмон нарсалар эшитаверганимдан кейин ўзидан ўзи тўхтаб қоларкансиз. Бўлди, ҳеч нарса қилгингиз келмайди. Рақс санъатига аслида бойлик учун, пул учун, шон-шуҳрат учун эмас, профессионал ижод учун, рақс санъатига муҳаббатим кучли бўлгани учун келганман. Агар рақс санъатида мени ҳақиқатан ҳам қабул қила олишганида, мен балким тўйларда камнамо бўлардим», — дейди Паризода.
Изоҳ (0)