«Қалпоқ» ҳажвий кўрсатувидаги Салтанат образи билан томошабинлар меҳрини қозонган актриса Ширмоной Абдуллаева «Ўзим» лойиҳасига берган интервьюсида ҳаётидаги жудоликлар ҳақида сўзлаб берди.
«2003 йилда онам оламдан ўтдилар. Менинг бахтсизлигимнинг бошланиши шу деб ўйлайман. Мен ҳамиша кимгадир суяниб яшаганман. Кўринишим шаддод бўлгани билан, кўнглим жуда бўш. Онам ўтганларидан кейин мен бу дунёда йўқ бўлиб қолдим. Биттагина фарзандимга онам қарардилар. Улар мени доим рағбатлантириб турардилар. Яхшиям артист бўлган экансан, тикишни билмайсан, чеварликни билмайсан, деб кўнглимни кўтариб турардилар. Ўша пайтда онамни йўқотиш катта жудолик бўлди. Онамдан кейин энг яхши кўрган синглим оғир касал бўлиб, бир йилнинг ичида у ҳам вафот этди. Ундан кейин энг кичкина, эрка укам 48 ёшида ҳаётдан кўз юмди. Бу жудоликлардан кейин мен гангиб қолишни бошладим. Шундан кейин оёғим юрмай қолди», — дейди актриса.
Ширмоной Абдуллаева қаттиқ тушкунликка тушиб қолган бир пайтда бир таклиф унинг ҳаётини ўзгартириб юборди.
«Ўша пайтда ‘Қалпоқ’ ҳажвий кўрсатуви ташкил этилган. Кўрсатувда қаҳрамонга хотин керак экан. Мени излаб топиб, Салтанат образини таклиф қилишди. Мана, салкам 20 йилдан бери шу кўрсатувда ўйнаб келяпман. Шу билан чалғидим яна. Лекин ғамни унутиб бўлмайди», — дейди актриса.
Аввалроқ «Қалпоқ»чилар — Мараймамат ва Салтанат — Раҳмонали Суропов ва Ширмоной Абдуллаева «Омон-омон» кўрсатувида меҳмон бўлиб, ҳаётда ёшлари орасида неча йил фарқ борлиги ҳамда яқин опа-ука тутинганлари ҳақида сўзлаб берган эди.
Изоҳ (0)