Raqqosa Parizoda “O‘zim” loyihasiga bergan intervyusida professional raqsda uni hanuzgacha qabul qilishmagani, ustozlaridan juda ko‘p tanqidlar eshitishini so‘zlab berdi.
“Raqs san’atiga kirganimdan boshlab buvijonim aytardilarki, zo‘r raqqosa bo‘lgin, O‘zbekistonda xizmat ko‘rsatgan unvonini olgin, deb turmush qurganimcha shu narsaga harakat qildilar. Shu unvonni olvolgin, turmush qurgan joyingga ham chiroyli borasan. Ha, anavi raqqosa keldi, deyishmaydi. Davlat odami, hurmatli Parizodaxon keldi, deyishadi. Chiroyli kutib olishadi turmush qurgan joyingda ham, degandilar. Juda ham xohlagandilar shu unvonni olishimni. Vaqtlar o‘tyapti, men juda ko‘p harakat qildim, bo‘lmadi. Raqs olamida qadrim bo‘lmagani uchun bu sohadan sekin chiqib ketishga harakat qildim. To‘g‘ri, raqsimni, ijodimni davom ettiraman. O‘zimning orzularim bor, o‘sha orzularim ushalmaguncha o‘qiyotgan kitobimni yopib qo‘ya olmayman, degan fikr bor menda. Aksariyat ustozlarimiz meni ko‘p kamsitib, xafa qilib, juda ko‘p dilimni og‘ritishgan. Shuning uchun raqs olamidan chiqishga harakat qildim. Borsam ham, tez chiqib ketishga harakat qilaman”, — deydi raqqosa.
“Xoreografiya bilim yurtida shunday kirsangiz, siz haqingizda gapirishadi. Bu raqs san’atini buzyapti, bu merosiy raqslarni buzyapti, deb baland ovozda gapirishadi. Kirgan joyimda yig‘lab chiqib ketardim. Har imtihonda shu mavzu. Men raqs haqida gapirsam, faqat ko‘zimga yosh keladi, chunki qadrim bo‘lmadi. Boshqa hech qanaqasiga ko‘zimga yosh keltira olmaysiz. Hayotda har bir narsa sinov deb bilaman. Buyoqda bo‘lmagan bo‘lsa, xalqimizning mehr-muhabbatiga erishdim. Buyam hayotda hech narsa to‘la-to‘kis bo‘lmaydi, degan narsani yuzaga keltiradi. Parizoda, mana shu harakating noto‘g‘ri, mana bunaqa qilsang, mana bunaqa chiqadi, kel, shunaqa qilaylik, degan biror ustoz chiqmadi. Mening ichim qaynab turibdi, nimadirlar qilaman: ansambl ochganman, u ustozni olib kelaman, raqs qo‘ydiraman, bu ustozni olib kelib, mana bunaqa qilaman, derdim. Nimaga ansambl ochdim? ‘Xalqlar do‘stligi’da shoular qilaman, deb o‘ylardim. Lekin hadeb yomonlayverib, bunday o‘ynasang ham bo‘lmaydi, unday o‘ynasang ham bo‘lmaydi, degan yomon narsalar eshitaverganimdan keyin o‘zidan o‘zi to‘xtab qolarkansiz. Bo‘ldi, hech narsa qilgingiz kelmaydi. Raqs san’atiga aslida boylik uchun, pul uchun, shon-shuhrat uchun emas, professional ijod uchun, raqs san’atiga muhabbatim kuchli bo‘lgani uchun kelganman. Agar raqs san’atida meni haqiqatan ham qabul qila olishganida, men balkim to‘ylarda kamnamo bo‘lardim”, — deydi Parizoda.
Izoh (0)