Халқ депутатлари Андижон шаҳар кенгашининг 17 май куни ўтказилган навбатдаги сессиясида депутатлар тинтувдан ўтказилгани, ушбу сессияда Андижонда ер сотувчиларнинг кирдикорларини фош қилиб юрган депутатни прокурор тақдимномасига кўра дахлсизлик ҳуқуқидан маҳрум қилингани ҳақида хабар берилган эди. Мазкур ҳолат Олий Мажлис Сенатининг Маҳаллий ҳокимият вакиллик органлари фаолиятига кўмаклашувчи комиссияси томонидан назоратга олинди.
Интернетда тарқалган хабарлар кўра, ушбу сессиясида халқ депутатлари Андижон шаҳар кенгаши айрим депутатларининг дахлсизлик ҳуқуқига риоя қилинмаганлиги қайд этилган.
Унда Андижон шаҳар кенгаши депутатини дахлсизлик ҳуқуқидан маҳрум қилиш бўйича прокурор тақдимномаси дастлаб «Регламент ва депутатлик одоби» масалалари бўйича доимий комиссияда кўриб чиқилмасдан сессия кун тартибига киритилгани, сессия материаллари депутатларга танишиб чиқиш учун олдиндан тақдим этилмаганлиги, сессия очиқ ошкора ўтказилмаганлиги таъкидланган.
Сенат матбуот хизматининг маълум қилишича, ҳолат Маҳаллий ҳокимият вакиллик органлари фаолиятига кўмаклашувчи комиссия томонидан назоратга олинган, ҳозирда ўрганиш ишлари олиб борилмоқда.
«Ўрганиш натижалари тўғрисида қўшимча маълумот берилади», — дейилади хабарда.
Аввалроқ Коррупцияга қарши курашиш агентлиги прокурорнинг бундай ҳаракатини «оқлаб бўлмаслиги»ни маълум қилиб, прокурор коррупция ҳолати ҳақида хабар берган шахсни ҳимоя қилиши кераклигини таъкидлаганди.
Миллий гвардия маълумотларига кўра, Андижон шаҳар ҳокимининг топшириғига асосан сессия иши бошлангунга қадар Андижон шаҳар ИИБ, шаҳар прокуратураси ва ҳокимлигидан ажратилган масъул ходимлар кузатуви остида қўриқлаш ходими томонидан ташриф буюрган сессия қатнашувчилари металлодетектор ёрдамида кўрикдан ўтказилган ва уяли алоқа ҳамда овозли видеога олувчи воситаларини қолдириб киришлари талаб этилган.
Изоҳ (0)