Андижон вилоятида беш нафар эркак дала шийпонида 18 ёшли келинни зўрлагани, келиннинг яқинлари қонунбузарларга чора кўришни сўраётгани ҳақида хабарлар тарқалган, ҳолат юзасидан жиноят иши қўзғатилганди. Ушбу ҳолат Маҳалла ва оилани қўллаб-қувватлаш вазирининг шахсий назоратига олинган бўлиб, ҳозирга қадар вилоят ИИБ раҳбарияти билан воқеа тафсилотлари бўйича доимий мулоқот олиб борилмоқда.
Вазирлик матбуот хизматининг маълум қилишича, ҳолат тасдиқланадиган бўлса, суд жараёнларида вазирлик томонидан малакали адвокат ёлланади ҳамда суддан жиноятчиларга нисбатан қонунчиликда белгиланган энг оғир жазо тайинланиши сўралади.
«Маҳалла ва оилани қўллаб-қувватлаш вазирлиги мазкур жиҳатларни инобатга олган ҳолда мавзуга оид қонун нормалари ҳамда айби исботланган жиноятчига нисбатан жавобгарликни кескин кучайтириш бўйича Олий Мажлис Сенатига ўзининг асосли таклифларини киритди. Шунингдек, келгусида бундай салбий ҳолатларнинг олдини олиш, аёлларнинг ҳуқуқий саводхонлигини ошириш бўйича вазирлик томонидан тегишли чора-тадбирлар мунтазам давом эттирилади», — дейилади хабарда.
Айни вақтда Маҳалла ва оилани қўллаб-қувватлаш вазирининг биринчи ўринбосари Гулнора Маруфова бошчилигидаги ишчи гуруҳ аъзолари маҳаллий ҳокимлик вакиллари билан биргаликда Андижон туманига бориб, жабрланувчи билан кўришиб, суҳбатлашган. Таъкидланишича, унга барча зарурий, хусусан, психологлар ёрдами кўрсатилмоқда.
Маълумотларга кўра, 2021 йилнинг шу вақтига қадар Зўрлик ишлатишдан жабр кўрган шахсларни реабилитация қилиш ва мослаштириш марказларига мурожаат қилган 2437 нафар фуқаронинг 1156 нафарига психологик, 1026 нафарига ҳуқуқий, 77 нафарига тиббий ёрдамлар кўрсатилган 11 300 нафарига «Ҳимоя ордери» берилган.
Эслатиб ўтамиз, ижтимоий тармоқларда тарқалган хабарда Андижон вилоятида 5 ойлик келинчак дала шийпонида идишларни ювиш учун чиққанида спиртли ичимлик таъсирида бўлган беш киши томонидан қўл-оёғини боғлаб, зўрлангани айтилган. Ҳолат юзасидан вилоят прокуратураси баёнот бериб, тегишли экспертизалар тайинлангани, терговга қадар текширув ҳаракатлари давом этаётганини билдирган. Бош прокуратура матбуот хизмати ҳолат бўйича қўшимча маълумотларни тақдим этиб, аёлни зўрлаганликда беш эмас, балки олти киши гумон қилинаётгани, уларнинг барчаси Андижон туманида яшашини маълум қилганди.
Изоҳ (0)