Тошкент метрополитени Сергели метро йўналишидаги бекатлардан бирида электр таъминоти узилиб қолгани борасидаги ҳолатга изоҳ берди.
Маълум қилинишича, 18 май куни соат 15:25 да Тошкент шаҳрида электр таъминотининг узилиши содир бўлган. Бу эса Тошкент метрополитенининг Сергели йўналишидаги «5-бекат» станциясидаги электр таъминоти тизимига ҳам таъсир кўрсатган. Таъкидланишича, бекатда электр таъминоти соат 15:39 да қайта тикланган.
«Ушбу ҳодиса метро поездлари ҳаракатига таъсир кўрсатмади, чунки ҳаракат хавфсизлигини таъминлаш мақсадида, контакт рельслар захира қувват манбасига эга», — дейилади хабарда.
Сўнгги пайтларда ижтимоий тармоқларда Тошкент метрополитени билан боғлиқ камчиликлар ҳақида кўп маротаба ёзиб келинмоқда. Хусусан, 13 май куни «Амир Темур хиёбони» бекатида барча йўловчилар тушириб юборилган, 7 май куни соат 21:10 дан 22:00 гача Тошкент метрополитени Ҳалқа йўлининг 7-бекатида электр энергияси ўчиб қолганди. Ҳодиса метро поездлари ҳаракатига таъсир кўрсатмаган.9 апрель куни ижтимоий тармоқларда поезднинг очиқ эшиклар билан ҳаракати туширилган видео тарқалди. Шу билан бирга, метрополитендаги ерости ва ерусти поезд ҳаракатларининг бир нечта бошқа видеолари ҳам ижтимоий тармоқларда кўп бора муҳокама қилинди. 28 апрель куни эса туннелда тўхтаб қолган поезд ҳақидаги видео тарқалди, унда йўловчилар рельслар орқали ҳаракатланиб, бекатга етиб олгани тасвирланган.
18 март куни эса «Олмазор» (Чилонзор йўли) ва «Бекат-1» (Сергели йўли) орасидаги туннелда икки поезд тўқнашганди.
Изоҳ (0)