Ўзбекистонга 500 минг дозадан иборат ўзбек-хитой вакцинасининг навбатдаги партияси олиб келинди
Тошкентга 19 май куни ZF-UZ-VAC2001 вакцинасининг яна 500 минг дозадан иборат навбатдаги партияси Хитойдан олиб келинди, деб хабар бермоқда Соғлиқни сақлаш вазирлиги матбуот хизмати.
Фото: ССВ матбуот хизмати
Эслатиб ўтамиз, 18 май куни Ўзбекистонга ушбу вакцинадан 1 миллион доза келтирилиб, эмлаш жараёнларида фойдаланилаётган ZF-UZ-VAC2001 миқдори 3 миллион дозага етган эди.
Фото: ССВ матбуот хизмати
Фото: ССВ матбуот хизмати
Маълумот учун, ZF-UZ-VAC2001 коронавирусга қарши янги рекомбинант вакцина бўлиб, Хитой Фанлар академияси Микробиология институти олимлари томонидан яратилган, Anhui Zhifei Longcom Biopharmaceutical Co.Ltd фармацевтика компанияси томонидан ишлаб чиқилган. Вакцинанинг клиник тадқиқотлари ўзбекистонлик олимлар билан ҳамкорликда олиб борилган.
Ушбу вакцинанинг миллион дозадан иборат дастлабки партияси Ўзбекистонга 27 март куни, шунча дозадан иборат иккинчи партияси эса 27 апрель куни олиб келинган.
Инновацион ривожланиш вазирлиги ҳузуридаги Илғор технология марказининг лаборатория мудири Дилбар Долимованинг сўзларига кўра, маълум муддат вакциналар Хитойдан келтирилиши режалаштирилган. Лекин кейинчалик мазкур вакцинани Ўзбекистонда маҳаллийлаштириш мақсадида лаборатория ҳамда техник ва ишлаб чиқариш қувватларини инобатга олиб, Jurabek Laboratories МЧЖ қўшма корхонаси томонидан тақдим этилиши кўзда тутилган.
Изоҳ (0)