Qashqadaryo viloyatining Dehqonobod tumanidagi Jing‘il qishlog‘ida joylashgan tibbiyot punkti qayta ta’mirlanadigan bo‘ldi. Bu haqda “Daryo”ga tuman hokimligi axborot xizmati xabar berdi.
Ma’lum qilinishicha, tuman hokimining Jing‘il qishlog‘idagi qabulida aholi hokimga mazkur tibbiyot maskani haqida xabar berib, uning ta’mirtalabligidan shikoyat qilgan.
“Hokim aholi aytgan tibbiyot maskanida bo‘lib, uning ahvoli bilan tanishdi va ertagayoq yaroqsiz binoni buzib, tibbiyot maskani uchun yangi bino qurib berilishini ma’lum qildi”, — deydi “Yashnobod” MFY raisi Zokir Alimardonov.
Hokimlik axborot xizmatining ma’lumot berishicha, Zoir Aliqulovning “Yashnobod” MFY Jing‘il qishlog‘idagi qabulida aholini qiynab kelayotgan eng asosiy muammolarning uchtasiga yechim topilgan.
“Hokim qabulida bo‘lgan fuqarolar hududdagi tibbiyot markazini qayta ta’mirlash, yo‘l ta’miri va ichimlik suvi masalasida murojaat qildi. Topshiriqqa ko‘ra, qabuldan so‘ng aholi foydalanuvidagi uch kilometr yo‘lga shag‘al yotqizila boshlandi. Ichimlik suvi uchun quvur tortish harakati va tibbiyot maskanining yaroqsiz binosini buzish va yangisini qurish ishlari boshlab yuborildi”, — deydi hokimlik axborot xizmati xodimi.
Qo‘shimcha qilinishicha, hashar yo‘li bilan qishloq aholisi foydalanib kelayotgan uch kilometr yo‘lga shag‘al to‘kilib, tekislash ishlari olib borilgan.
Izoh (0)